ລໍາເມີ້ຍຈາກສາວເມືອງວຽງທອງ ເປັນລໍາທີ່ມີ ສໍານຽງສຽງໂອ່ຍ ທີ່ເປັນເອກະລັກສະເພາະຂອງຊົນເຜົ່າໄຕເມີ້ຍ ທີ່ສ່ວນຫຼາຍຕັ້ງຖິ່ນຖານບ້ານເຮືອນຢູ່ບັນດາແຂວງພາກກາງ-ພາກເໜືອ ໃນນີ້ຢູ່ຫຼາຍກວ່າໝູ່ແມ່ນ ແຂວງບໍລິຄໍາໄຊ ເມືອງປາກກະດິງ ເມືອງໄຊຈໍາພອນ ເມືອງຄໍາເກີດ ແລະ ເມືອງວຽງທອງ. ໃນເມື່ອກ່ອນປະຊາຊົນດໍາລົງຊີວິດຢູ່ຕາມແຄມສາຍນໍ້າ ສາຍພູ ທີ່ເຕັມໄປດ້ວຍທຳມະຊາດທີ່ອຸດົມສົມບູນດ້ວຍຊັບໃນດິນສິນໃນນໍ້າ, ຍຶດຖືອາຊີບ ເຮັດໄຮ່ພູ ເຮັດສວນປູກພືດຜັກໝາກໄມ້ຕາມລະດູການ, ຫາກິນລ້ຽງຊີບຕາມທຳມະຊາດ, ເກັບຜັກເຄື່ອງປ່າຂອງດົງ ແລະ ລ່າສັດໃນເມື່ອກ່ອນ.
ແຕ່ປັດຈຸບັນວິຖີຊີວິດແບບເກົ່າດັ້ງເດີມໄດ້ປ່ຽນແປງໄປໝົດແລ້ວ ເຊິ່ງປ່ຽນໄປຕາມສະພາບແວດລ້ອມ ແລະ ການເຕີບໃຫຍ່ຂະຫຍາຍຕົວຂອງຕົວເມືອງ ແລະ ປະເທດຊາດ. ສະນັ້ນ, ຖ້າຈະໄປຫາຟັງລໍາ ຫາເບິ່ງການດຳລົງຊີວິດແບບກ່ອນກີ້ ແມ່ນຫາເຫັນໄດ້ຍາກຂຶ້ນນັບມື້ແລ້ວ.
ດັ່ງນັ້ນ, ຊ່ອງໄຕເມີ້ຍ ແຊນແນວ ຈິ່ງໄດ້ສ້າງຊ່ອງນີ້ຂຶ້ນມາເພື່ອບັນທຶກ ແລະ ເກັບກຳ ກິດຈະກຳ ຮີດຄອງປະເພນີ ວິຖີຊີວິດຂອງເຜົ່ານີ້ໄວ້ໃຫ້ຍືນຍົງ ແລະ ໝັ້ນຄົງຕະຫຼອດໄປ.
15 сен 2024
