གང་བློ་མའི་བསྡུས་འགྲེལ།
གཞུང་གི་དོན།
ཐུགས་ལ་བསྟོད་པ། གསུང་ལ་བསྟོད་པ། སྐུ་ལ་བསྟོད་པ། གཟུངས་སྔགས། གསོལ་འདེབས།
ཐུགས་ལ་བསྟོད་པ།
གང་གི་བློ་གྲོས་སྒྲིབ་གཉིས་སྤྲིན་བྲལ་ཉི་ལྟར་རྣམ་དག་རབ་གསལ་བ། །
ཇི་སྙེད་དོན་ཀུན་ཇི་བཞིན་གཟིགས་ཕྱིར་ཉིད་ཀྱི་ཐུགས་ཀར་གླེགས་བམ་འཛིན། །
གང་དག་སྲིད་པའི་བཙོན་རར་མ་རིག་མུན་འཐོམས་སྡུག་བསྔལ་གྱིས་གཟིར་བའི། །
འགྲོ་ཚོགས་ཀུན་ལ་བུ་གཅིག་ལྟར་བརྩེ་
(དཔེ་གཟུགས་རང་བཞིན་བཅས་འདྲེས་པའི་རབ་སྤེལ་གྱི་རྒྱན)
གཞུང་ཚིག་འདིས་ནི་འཇམ་པའི་དབྱངས་ཀྱི་ཐུགས་ཀྱི་ཡོན་ཏན་བསྟན་པ་ཡིན་ལ། དེ་ཡང་། རྗེ་བཙུན་འཇམ་པའི་དབྱངས་གང་གི་བློ་གྲོས་སམ་མཁྱེན་པ་ནི། སྒྲིབ་གཉིས་ཀྱི་སྤྲིན་པ་དང་ཡོངས་སུ་བྲལ་བ་ཞེས་པས་རྗེ་བཙུན་འཇམ་པའི་དབྱངས་ཀྱི་སྤངས་པ་མཐར་ཐུག་པའི་ཡོན་ཏན་བསྟན་པ་དང་། ཉི་མ་སྟོང་དུ་ཤར་བ་ལྟར་མཁྱེན་པ་རབ་གསལ་བ་དེ་ཡིས། ཀུན་རྫོབ་དང་དོན་དམ་གྱིས་བསྡུས་པའི་ཆོས་ཇི་སྙེད་པ་སྟེ་བདེན་གཉིས་ཀྱིས་བསྡུས་པའི་དོན་ཀུན་ཇི་བཞིན་དུ་གཟིགས་པ་དང་། དེ་ལྟར་མཁྱེན་ཅིང་གཟིགས་པ་དེ་མཚོན་པའི་ཕྱིར་དུ་ཉིད་ཀྱི་ཐུགས་ཀ་ལ་གླེགས་བམ་འཛིན་པར་མཛད་པ་དང་། སྐྱེ་བོ་གང་ཟག་སྲིད་པའི་བཙོན་རའི་ནང་དུ། གནས་ལུགས་ལ་རྨོངས་པའི་མ་རིག་པའི་མུན་པ་འཐིབས་པའི་དབང་གིས་སྒོ་ཀུན་ནས་འཐོམས་པ་ལ་བརྟེན་ནས། སྡུག་བསྔལ་གསུམ་གྱིས་རྒྱུན་དུ་གཟིར་ཞིང་མནར་བའི་འགྲོ་བ་མགོན་མེད་པའི་ཚོགས་ཀུན་ལ། མ་བུ་གཅིག་པ་ལ་བརྩེ་བ་ལྟར་རྒྱུ་མེད་པར་ཐུགས་རབ་ཏུ་བརྩེ་བའི་ཐུགས་རྗེ་ཆེན་པོའི་གཞན་དབང་དུ་གྱུར་པའི་འཇམ་པའི་དབྱངས་ཞེས་ཐུགས་ལ་བསྟོད་པའོ།།
གསུང་ལ་བསྟོད་པ།
ཡན་ལག་དྲུག་ཅུའི་དབྱངས་ལྡན་གསུང་། །
འབྲུག་ལྟར་ཆེར་སྒྲོགས་ཉོན་མོངས་གཉིད་སློང་ལས་ཀྱི་ལྕགས་སྒྲོག་འགྲོལ་མཛད་ཅིང་། །
མ་རིག་མུན་སེལ་སྡུག་བསྔལ་མྱུ་གུ་ཇི་སྙེད་གཅོད་མཛད་རལ་གྲི་བསྣམས། །
(དཔེ་གཟུགས་རང་བཞིན་འདྲེས་པའི་རབ་སྤེལ་གྱི་རྒྱན།)
འདིས་ནི་རྗེ་བཙུན་འཇམ་པའི་དབྱངས་ཀྱི་གསུང་ལ་བསྟོད་པ་ཡིན་ཏེ། དེ་ཡང་། རྗེ་བཙུན་འཇམ་པའི་དབྱངས་ཀྱི་གསུང་ནི། གསུང་དབྱངས་ཡན་ལག་དྲུག་ཅུའམ་དྲུག་ཅུ་རྩ་བཞིའི་ཁྱད་ཆོས་དང་ལྡན་པའི་གསུང་ཡིན་ལ། (དྲུག་ཅུ་རྩ་བཞིའི་གྲངས་འདྲེན་ནི་རྗེ་ཙོང་ཁ་པའི་བསྟོད་སྤྲིན་རྒྱ་མཚོ་ལས་ཤེས་པར་བྱ།) དེ་ལྟ་བུའི་གསུང་དེ་ལ། ཁྱད་ཆོས་ཅི་ཞིག་ཡོད་སྙམ་ན། རང་གིས་ཇི་བཞིན་གཟིགས་པའི་དོན་བདེན་པར་སྨྲ་པས་འཇིགས་པ་མེད་པར་འཁོར་གྱི་ཚོགས་ལ་འབྲུག་གི་སྒྲ་ལྟར་ཆེས་ཆེར་སྒྲོག་པ་དང་། སུ་ཡིས་ཐོས་ན་དེའི་རྒྱུད་ཀྱི་ཉོན་མོངས་པའི་གཉིད་སྟུག་པོ་ལས་སློང་བར་མཛད་པ་དང་། དེའི་ལས་ཀྱི་ལྕགས་སྒྲོག་རྣམས་ཀྱང་འགྲོལ་བར་མཛད་ཅིང་། ལས་དང་ཉོན་མོངས་ཀྱི་རྩ་བ་གཏི་མུག་མ་རིག་པའི་མུན་པ་གཏན་དུ་སེལ་བ་དང་། དེ་སེལ་བ་ལ་བརྟེན་ནས་ལས་ཉོན་ལས་བྱུང་བའི་སྡུག་བསྔལ་གྱི་མྱུ་གུ་ཇི་སྙེད་པ་ཐམས་ཅད་རྩ་བ་ནས་གཅོད་པར་མཛད་པས། དེ་མཚོན་པའི་ཕྱིར་དུ་ཕྱག་ཏུ་རལ་གྲི་བསྣམས་ཞེས་རྗེ་བཙུན་འཇམ་པའི་དབྱངས་ཀྱི་གསུང་ལ་བསྟོད་པའོ།།
སྐུ་ལ་བསྟོད་པ།
གདོད་ནས་དག་ཅིང་ས་བཅུའི་མཐར་སོན་ཡོན་ཏན་ལུས་རྫོགས་རྒྱལ་སྲས་སྐུ། །
བཅུ་ཕྲག་བཅུ་དང་བཅུ་གཉིས་རྒྱན་སྤྲས་བདག་བློའི་མུན་སེལ་ཁྱོད་ལ་འདུད། །
(རང་བཞིན་བརྗོད་པའི་རྒྱན་དང་གཟུགས་རྒྱན་འདྲེས་པ། )
འདིས་ནི་རྗེ་བཙུན་འཇམ་པའི་དབྱངས་ཀྱི་སྐུ་ལ་བསྟོད་པ་ཡིན་ཏེ། དེ་ཡང་། སེམས་ཀྱི་རང་བཞིན་ལ་དྲི་མ་མ་ཞུགས་པས་སེམས་སྟེང་གི་རང་བཞིན་གྱི་དྲི་མ་ནི་གདོད་མ་ཉིད་ནས་དག་ཅིང་། སེམས་སྟེང་གི་གློ་བུར་གྱི་དྲི་མ་རྣམས་ཀྱང་དག་བྱེད་ཀྱི་གཉེན་པོ་ས་བཅུ་རིམ་བཞིན་སྒོམ་པ་ལ་བརྟེན་ནས་ས་བཅུའི་མཐར་སོན་ཏེ། གློ་བུར་གྱི་དྲི་མ་ཆོས་ཀྱི་དབྱིངས་སུ་ཟད་པའི་ཡོན་ཏན་གྱི་ལུས་སམ་དཀྱིལ་འཁོར་ཡོངས་སུ་རྫོགས་པའི་ཆོས་སྐུའི་གོ་འཕང་མངོན་དུ་མཛད་ཀྱང་། གདུལ་བྱའི་དོན་དུ་ཆོས་སྐུའི་དབྱིངས་ལས་རྒྱལ་སྲས་བྱང་ཆུབ་སེམས་དཔའི་ཚུལ་བསྟན་པར་མཛད་ཅིང་། མཚན་བཟང་པོ་སུམ་ཅུ་སོ་གཉིས་དང་དཔེ་བྱད་བརྒྱད་ཅུ་སྟེ་བསྡོམས་པས་བཅུ་ཕྲག་བཅུ་དང་བཅུ་གཉིས་ཀྱི་རྒྱན་གྱིས་སྤྲས་ཤིང་མཛེས་པར་བྱེད་པའི་རྗེ་བཙུན་འཇམ་པའི་དབྱངས་ཏེ། བདག་གི་བློའི་མུན་པ་སེལ་བར་མཛད་པ་ཁྱོད་ལ་སྒོ་གསུམ་གུས་པ་ཆེན་པོས་འདུད་དོ།།
འདིར། རྒྱལ་སྲས་ཐུ་བོའི་སྐུ། ཞེས་ཐུ་བོ་དང་། མུན་སེལ་འཇམ་པའི་དབྱངས་ལ། ཞེས་འཇམ་པའི་དབྱངས་བསྣན་པ་མང་ཞིང་བདག་གི་ཁ་ལ་དེ་ལྟར་བྱང་མོད། བསྟན་འགྱུར་ནང་། ཐུ་བོ་ཞེས་པ་དང་། འཇམ་པའི་དབྱངས་ཞེས་པ་མི་གསལ་ལ། སྤྱིར་གང་བློ་མ་འདི་ཚེག་བར་བཅོ་ལྔ་ཅན་ཡིན་པ་ལ། ཐུ་བོ་དང་། འཇམ་པའི་དབྱངས་ཞེས་བསྣན་ན་ཚེག་བར་བཅུ་བདུན་དུ་འགྱུར་བས་བརྟག་དགོས་པར་སྣང་ངོ་།།
གཟུངས་སྔགས།
ཨོཾ་ཨ་ར་པ་ཙ་ན་དྷཱིཿ
ཨོཾ་ ནི་སྔགས་ཀྱི་མགོ་འདྲེན་ཏེ། ཨ་ཨུ་མ་བཅས་ཡི་གེ་གསུམ་འདུས་པའི་སྐུ་གསུང་ཐུགས་མཚོན།
ཨ་ར་ ནི་འགྲོ་བ་སེམས་ཅན་ལ་གོ།
པ་ཙ་ན་ ནི་སྨིན་པར་བྱེད་པ་ལ་གོ།
དྷཱིཿ དེ་ཉིད་རྟོགས་པའི་ཡེ་ཤེས་སོ།།
གསོལ་འདེབས།
བརྩེ་ལྡན་ཁྱོད་ཀྱི་མཁྱེན་རབ་འོད་གསལ་གྱིས།།
བདག་བློའི་གཏི་མུག་མུན་པ་རབ་བསལ་ནས།།
བཀའ་དང་བསྟན་བཅོས་གཞུང་ལུགས་རྟོགས་པ་ཡི།།
བློ་གྲོས་སྤོབས་པའི་སྣང་བ་བསྩལ་དུ་གསོལ།།
(ལྡན་པའི་གཟུགས་རྒྱན། / ཆ་ཤས་གཟུགས་རྒྱན། /)
འདི་སུས་མཛད་མིན་མི་ཤེས་ཀྱང་། རྒྱུན་དུ་ཁ་ལ་གོམས་པའི་གསོལ་འདེབས་ཤིག་ཡིན། གོ་དོན་ནི། དེ་ལྟར་གོང་དུ་རྗེ་བཙུན་འཇམ་པའི་དབྱངས་ཀྱི་སྐུ་གསུང་ཐུགས་ལ་བསྟོད་པ་ཕུལ་ཏེ། གསོལ་བར་གདབ་པར་བྱ་བ་ནི། འགྲོ་བ་ཀུན་ཐུགས་བརྩེ་བ་སྙིང་རྗེ་ཆེན་པོ་དང་ལྡན་པའི་མགོན་པོ་ཁྱོད་ཀྱི་མཁྱེན་རབ་གྱི་འོད་གསལ་གྱིས། བདག་དུག་གསུམ་ཉོན་མོངས་ཀྱི་ཀུན་ནས་འཐིབས་པའི་གཏི་མུག་གི་མུན་པ་སྟུག་པོ་འདི་རབ་ཏུ་བསལ་ནས། རྒྱལ་བའི་བཀའ་དང་དེའི་དགོངས་འགྲེལ་གྱི་བསྟན་བཅོས་སོགས་གཞུང་ལུགས་ཀུན་གྱི་དོན་བདེ་བླག་ཏུ་རྟོགས་པའི་བློ་གྲོས་ཀྱི་སྤོབས་པའི་སྣང་མྱུར་དུ་བསྩལ་དུ་གསོལ་ཞེས་གསོལ་བ་འདེབས་པའོ།།
26 авг 2024