စစ်ဘေးရှောင်နေရသည့် မတ္တရာဒေသခံ သောင်းနှင့်ချီ အကူအညီလိုအပ်နေ 

စစ်ဘေးရှောင်နေရသည့် မတ္တရာဒေသခံ သောင်းနှင့်ချီ အကူအညီလိုအပ်နေ
…………..
တိုက်ပွဲများကြောင့် မတ္တရာမြို့နယ်အနှံ့မှ ဒေသခံပြည်သူတို့ စစ်ဘေးရှောင်နေကြရပြီး၊ မြို့နယ်ပြည်သူ့အုပ်ချုပ်ရေးအဖွဲ့ (ပအဖ) ၏ စာရင်းများအရ လက်ရှိအချိန်အထိ မြို့နယ်အနှံ့တွင် စစ်ဘေးရှောင်စခန်းပေါင်း ၃၂ ခု၊ လူဦးရေ တစ်သောင်းဝန်းကျင်ခန့်အထိ ရှိနေကြောင်း သိရသည်။
အဆိုပါ စစ်ရှောင်စခန်းများကို ပအဖလက်အောက်ရှိ မြို့နယ်လူသားချင်းစာနာထောက်ထားရေးအဖွဲ့က နေထိုင်ရေး၊ စားသောက်ရေး၊ ကျန်းမာရေးစောင့်ရှောက်မှုများကို လုပ်ဆောင်ပေးနေသော်လည်း ခိုလှုံသူ အရေအတွက် များပြားခြင်းကြောင့် လုံလောက်မှုမရှိဖြစ်နေသည်ဟု စစ်ရှောင်များနှင့် စခန်းတာဝန်ရှိသူတို့အဆိုအရ သိရသည်။
လက်ရှိတွင် ခိုလှုံနေထိုင်ရေးအဆင်ပြေသော်လည်း စားသောက်ရေး၊ကျန်းမာရေးစောင့်ရှောက်မှုနှင့် အခြေခံ လိုအပ်ချက်ဖြစ်သော စောင်၊ခြင်ထောင်များ လိုအပ်လျက်ရှိကြောင်း စစ်ရှောင်လာသူ မတ္တရာဒေသခံများက ပြောကြသည်။
မတ္တရာစစ်ရှောင်စခန်းတချို့တွင် ကလေး၊လူကြီးအများအပြား ဖျားနာနေကြပြီး ကျွမ်းကျင်ဆရာဝန် လုံလောက်စွာမရှိဘဲ၊ CDM သူနာပြုဆရာမတချို့က လာရောက်ကုသပေးနေသည်။
မန္တလေးမြောက်ဘက် မတ္တရာတွင် တိုက်ပွဲများဆက်လက်ရှိနေပြီး မတ္တရာမြောက်ဘက် စဉ့်ကူးနှင့်သပိတ်ကျင်းမြို့တို့ကိုမူ တော်လှန်ရေးအင်အားစုများက သိမ်းပိုက်ထားသည်။
ရိုက်ကူး၊ တင်ဆက် - မိုးဦး၊ မြတ်ကြီး