စဉ့်ကူးမြို့ကို ပြန်ရရန် စစ်ကောင်စီကြိုးပမ်းသော်လည်း မအောင်မြင်
-----------------
မန္တလေးတိုင်း၊ စဉ့်ကူးမြို့ကို တော်လှန်ရေးပူးပေါင်းတပ်များ ဆက်သိမ်းပိုက်ထားပြီး စစ်ကောင်စီက ရေကြောင်းမှ အင်အားဖြည့်တင်း၍ မြို့ကို ပြန်လည်ရယူရန် ကြိုးစားနေကြောင်း ဒေသခံများနှင့် ပြည်သူ့ကာကွယ်ရေးတပ်မတော် -မန္တလေး (MDY-PDF) ထံမှ သိရသည်။
နိုင်ငံအလယ်ပိုင်း စီးပွားရေးအချက်အချာကျသည့် မန္တလေးမြို့မှ ၅၄ မိုင် ကွာဝေးသည့် စဉ့်ကူးမြို့နယ်ရှိ စစ်ကောင်စီ စခန်းများအားလုံးနှင့် စဉ့်ကူးမြို့ကို ဇွန် ၂၅ ရက်မှ စတင်တိုက်ခိုက်ခဲ့ရာ ပြီးခဲ့သည့် ဇူလိုင် ၁၇ ရက်နေ့တွင် MDY-PDF နှင့် ပူးပေါင်းတပ်များက အပြီးသတ်သိမ်းပိုက်ရရှိခဲ့သည်။
မန္တလေးတိုင်းမှ မြို့တစ်မြို့ကို PDF လက်ထဲသို့ ပထမဆုံးအကြိမ် လက်လွှတ်ဆုံးရှုံးလိုက်ရပြီးနောက် စစ်ကောင်စီ ထိန်းချုပ်မီဒီယာများနှင့် ဝါဒဖြန့်စာမျက်နှာများက စဉ့်ကူးမြို့ကို ပြန်လည်သိမ်းပိုက်နိုင်ပြီဟု ဝါဒဖြန့်ဖော်ပြခဲ့ကြသည်။
စဉ့်ကူးတစ်မြို့လုံးကို တော်လှန်ရေးတပ်ဖွဲ့များက အပြည့်အဝထိန်းချုပ်ထားဆဲဖြစ်သည်ဟု MDY-PDF ၏ ပြန်ကြားရေးတာဝန်ခံ ကိုအော်စမွန်က ယနေ့ (ဇူလိုင်၂၂) နံနက်တွင် Myanmar Now ကို ပြောသည်။
သတင်း၊ တင်ဆက် - နေမင်းနီ၊ မြတ်ကြီး
6 сен 2024