မနက်ခင်းတိုင်း မနက်ခင်းတိုင်း အိပ်ရာကနေ နိုးထဖို့တောင်မှ ကြောက်ရွံ့နေရသလို နိုးထလာလိုက်တိုင်းလဲ အရိုက်အနှက် အဆဲအဆိုခံရတဲ့အပြင် ခြိမ်းခြောက်မှုတွေကိုပါ နေ့စဉ်နီးပါး ခံစားနေကြရမယ်ဆိုရင် ဘယ်လိုအင်အားနဲ့ ရှေ့ဆက်ကြမလဲ။ ပိုဆိုးတာက အဲ့ဒီလို ကိုယ့်ကို ရိုက်နှက် ဆဲဆိုပြီး ခြိမ်းခြောက်နေတဲ့သူက ကိုယ့်အလုပ်ရှင် ဖြစ်နေတဲ့အပြင် ကိုယ်က ရေခြားမြေခြား နိုင်ငံခြားမှာ လူမသိသူမသိ အသိမိတ်ဆွေ မရှိ။ ကိုယ်လွတ်ရုန်းပြေးပြီး အကူအညီတောင်းရအောင်လည်း ကိုယ့်မှာ ဘယ်သူ့ကို အားကိုးရမှန်းမသိသလို ကိုယ့်အလုပ်ရှင်ထဲက တစ်ယောက်က ရဲဖြစ်နေလို့ ပိုကြောက်နေရတဲ့အပြင် ကိုယ်ပြောတာကို ဘယ်သူကရော ယုံမှာလဲ ကိုယ့်ဘက်မှာ ဘယ်သူကမှ ရှိနေမှာမဟုတ်ဆိုတဲ့အတွေးတွေနဲ့ အရာရာက ကိုယ့်အတွက် ကြောက်စရာ ကူရာ ကယ်ရာမဲ့။
ကျွန်တော်အခုပြောပြခဲ့တဲ့ အချက်အလက်တွေ အကုန်လုံးက အသက် ၂၃ နှစ်အရွယ် Piang Ngaih Don ဆိုတဲ့ မြန်မာပြည်က ချင်းမလေး စင်္ကာပူမှာ နေ့စဉ်နဲ့အမျှ ခံစားတွေ့ကြုံနေရတဲ့ အဖြစ်အပျက်တွေလို့ ပြောရမှာ ဖြစ်ပါတယ်။
Piang Ngaih Don ကို ဇွန်လ ၁၃ ရက် ၁၉၉၂ ခုနှစ်မှာ ချင်းပြည်နယ် တီးတိန်မြို့နယ်က ဒင်ပီးရွာကလေးမှာ မွေးဖွားခဲ့ပါတယ်။ သူတို့ရွာကလေးမှာ လူဦးရေ ၁၅၀၀ ခန့်ရှိပြီးတော့ ကလေးမြို့ကနေ လေးနာရီလောက် ဆိုင်ကယ်စီးရတယ်လို့ ဆိုပါတယ်။ မွေးချင်းမောင်နှမ ဆယ်ယောက်ရှိတယ်လို့ ဆိုပါတယ်။ Piang အသက် လေးနှစ်အရွယ်လောက်ကို ရောက်တဲ့အချိန်မှာ သူ့ရဲ့မိဘတွေက ရှေ့ဆင့်နောက်ဆင့် တစ်နှစ်စီခြားပြီး ကွယ်လွန်သွားခဲ့တယ်လို့ ဆိုပါတယ်။ Piang ဟာ ကိုးတန်းအထိပဲ ကျောင်းတက်ပြီး ကျောင်းထွက်ခဲ့တယ်လို့ ဆိုပါတယ်။ နောက် ဒီလိုနဲ့ နေလာရင်းက ကောင်လေးတစ်ယောက်နဲ့ ချစ်ကြိုက်မိပြီးတော့ ကိုယ်လေးလက်ဝန် ရှိလာခဲ့ပါတယ်။ ဒါပေမယ့် အဲ့ဒီကောင်က ခြေရာဖျောက်သွားတဲ့အတွက် Piang တစ်ယောက် တစ်ကိုယ်တော် မိခင်အနေနဲ့ သူ့ဘဝခရီးကို ဆက်လှမ်းခဲ့ရပြန်ပါတယ်။ ၂၀၁၃ ခုနှစ် ဖေဖော်ဝါရီလမှာသူ့သားလေးကို မွေးဖွားခဲ့ပါတယ်။ သူနဲ့ တရွာထဲနေ စင်္ကာပူမှာ အလုပ်လုပ်နေတဲ့ သူတစ်ဦးရဲ့အဆိုအရ Piang ဟာ စကားနည်း အနေအေးပြီးတော့ သူ့မိသားစုကို ခင်တွယ်တဲ့ မိန်းကလေးတစ်ဦးလို့ ဆိုပါတယ်။
စကားနည်း အနေအေးပြီးတဲ့ ကျွန်တော်တို့ရဲ့ မြန်မာနိုင်ငံက ချင်းမလေး Piang အတွက် လောကဒဏ်ရဲ့ ရိုက်ခတ်မှုတွေက တစ်လှိုင်းပြီး တစ်လှိုင်းပါပဲလား။ ဒီအခုပြောပြခဲ့သလောက်က တကယ့်ကို အကင်းပဲ ရှိပါသေးတယ်။
Piang ဟာ ချင်းပြည်မှာ နေစဉ်ကာလ သူငယ်စဉ်ဘဝမှာတုန်းက တောင်သူ အလုပ်ကို လုပ်ကိုင်တယ်လို့ ယူဆရပြီးတော့ သူအရွယ်ရောက်လာတဲ့အချိန်မှာတော့ ဆောက်လုပ်ရေးလုပ်ငန်းထဲကို အလုပ်သမားအနေနဲ့ ဝင်ရောက်ပြီး အလုပ်ကြမ်း လုပ်ကိုင်ခဲ့တယ်လို့ဆိုပါတယ်။ ဒါပေမယ့်လည်း အလုပ်ကြမ်းသမားလစားနဲ့က ဘယ်လိုလုပ်လောက်ငှမှုရှိမှာလဲလေနော်။ အဲ့ဒီလိုနဲ့ နေလာတာမှာ သူ့ရွာထဲကလူတွေက စင်္ကာပူကို သွားပြီးတော့ အိမ်ဖော်အလုပ်လုပ်တယ်ကြားပြီးတော့ အဆင်ပြေတယ်လို့ ကြားသိရတော့ ၂၀၁၅ ထဲမှာ သူလည်း စင်္ကာပူကို အလုပ်သွားလုပ်မယ်ဆိုပြီးတော့ ဒီဆောက်လုပ်ရေးမှာ အလုပ်လုပ်နေတာကနေ ထွက်လိုက်တယ်လို့ ဆိုပါတယ်။
အဲ့လိုနဲ့ စင်္ကာပူကို သွားပြီး အလုပ်လုပ်ဖို့အတွက် လိုအပ်တာတွေ ပြင်တာဆင်တာတွေ လုပ်ရတာပေါ့လေ။ ပထမဆုံးကတော့ ပတ်စပို့စာအုပ်လုပ်ရတာပေါ့။ အဲ့ဒီမှာ ပထမဆုံး အခက်အခဲကို စကြုံရတာပါပဲ။ Piang ရဲ့ အသက်က ၂၃ နှစ် ပြည့်ဖို့ ၂ လ လိုနေတယ်။ စင်္ကာပူကို အိမ်အကူအနေနဲ့ အလုပ်သွားလုပ်မယ်ဆိုရင် အနည်းဆုံး အသက်က ၂၃ နှစ် ပြည့်မှရမယ်။ အဲ့ဒီမှာ Piang နဲ့ သူ့ကို နိုင်ငံခြားပို့မယ့် အေးဂျင့်က စကားပြောရပြီပေါ့လေ။ Piang က အေးဂျင့်ကနေတဆင့် လဝက က အရာရှိတွေကို လာဘ်ထိုးပြီးတော့ သူ့ရဲ့ မွေးသက္ကရာဇ်ကို ဇွန်လ ၁၃ ရက် ၁၉၉၂ ကနေ ဧပြီလ ၁၃ ရက် ၁၉၉၂ ကို ပြောင်းခိုင်းလိုက်ရတယ်။ အဲ့ဒီတော့ သူ့အသက်က မီသွားပြီပေါ့။ အဲ့ဒီလိုနဲ့ ပတ်စပို့စာအုပ်တွေ စာရွက်စာတမ်းတွေနဲ့ စင်္ကာပူကို ၂၀၁၅ ခုနှစ် မေလထဲမှာ ရောက်လာခဲ့ပါတယ်။
မေလ ၂၈ ရက်နေ့ ၂၀၁၅ ခုနှစ်မှာတော့ Piang ကို Bishan မှာရှိတဲ့ မိသားစုတစ်ခုကနေပြီးတော့ အိမ်အကူအတွက် စာချုပ်ချုပ် ငှားလိုက်ပါတယ်။ ဒီလို အလုပ်ရပြီလို့ သူ့ကို သူ့အလုပ်အေဂျင်စီက အကြောင်းကြားတဲ့အချိန်မှာ သူ့စိတ်ထဲမှာ ဘယ်လောက်တောင် ပျော်နေခဲ့မလဲ တွေးကြည့်လို့ရနိုင်ပါတယ်။ Piang ရဲ့ ရည်မှန်းချက်က သူ့သားနဲ့ သူ့မိသားစုအတွက် ငွေကြေးတင့်တောင့် တင့်တယ်လေး ထားချင်းတာ။ ပြီးတော့ ကလေးမြို့မှာ သူနဲ့ သူ့သားလေးအတွက် မြေကွက်လေးတစ်ကွက်ဝယ်မယ် အိမ်ကလေးဆောက်မယ် ဆိုပြီး ရည်ရွယ်ထားခဲ့တာ။ အဲ့ဒီအချိန်တုန်းက သူ့စိတ်ထဲမှာ သူ့မျှော်မှန်းချက်တွေအတွက် ခြေတစ်လှမ်း နီးကပ်လာပြီလို့ တွေးပြီး ပျော်နေခဲ့မယ်ဆိုတာ အသေအချာပါပဲ။ ဒါပေမယ့် တကယ့်အဖြစ်မှန်မှာတော့ ဒီမိသားစုဆီကို အိမ်အကူသွားလုပ်ခဲ့တာက သူ့အတွက် သေမင်းဆီကို ခြေလှမ်းလှမ်းသွားခဲ့တာနဲ့ အတူတူပဲ ဆိုတာ အဲ့ဒီအချိန်တုန်းကတော့ Piang လေး မသိခဲ့ပါဘူး။
Piang အလုပ်သွားလုပ်ခဲ့တဲ့ အိမ်က အိမ်ရှင်တွေ အကုန်လုံးက ဘီလူးသဘက်ထက် ဆိုးဝါးတဲ့ လူတွေလို့ပဲ ကြိုပြီး ပြောချင်ပါတယ်။ သူအလုပ်သွားလုပ်ခဲ့တဲ့အိမ်မှာ လူ ငါးယောက်ရှိပါတယ်။ အသက်သုံးဆယ့်ငါးနှစ်အရွယ်ရှိ Gaiyathiri Murugayan အမည်ရှိ အမျိုးသမီးရယ်၊ သူ့ရဲ့ လင်ယောက်ျားဖြစ်သူ အသက် ၃၇ နှစ်အရွယ်ရှိ ရဲအရာရှိ Kevin Chelvam ရယ်နောက် Gaiyathiri ရဲ့ အမေဖြစ်သူ အသက် ၅၇ နှစ်အရွယ်ရှိ Prema Naraynasamay အပါအဝင် လူကြီးသုံးယောက်ပေါ့။ နောက် Gaiyathiri နဲ့ Kevin မှာက အသက် ၄ နှစ်အရွယ် သမီးလေးရယ် နောက် မွေးကင်းစ သားကလေးတစ်ယောက်ရှိတယ်ပေါ့။ ဒီအိမ်ကို စရောက်တာနဲ့ Piang ဟာ စပြီးတော့ အနိုင်ကျင့်နှိပ်စက်မှုဒဏ်ကို တဖြည်းဖြည်းချင်း ခံစားလာရတာမှာ ကြာလာလေလေ အခြေအနေက ပိုဆိုးလာလေလေ ဖြစ်ခဲ့ပါတယ်။
#storybears #storybearsmm #myanmar #crime #truecrime #ဖြစ်ရပ်မှန် #မှုခင်း #စင်္ကာပူ
20 окт 2024
