![ဖုန်ကန်ရာဇီ ရေခဲတောင်ထိပ်ဆီ [အပိုင်း - ၁] | Up To the Top of Phong Kan Razi Glacier [Episode - 1]](/img/logo.svg){kind=logo}
အမြင့်ပေ ၁၁၉၀၀ ကျော်ရှိတဲ့ ဖုန်ကန်ရာဇီ ရေခဲတောင် ဟာ ကချင်ပြည်နယ် မြောက်ပိုင်း မချမ်းဘော၊ ပူတာအို နဲ့ နောင်မွန်းမြို့နယ်တွေအတွင်းမှာ တည်ရှိပါတယ်။ ဒါကြောင့် ဒီတောင်ရှိရာဆီ တောလမ်းလျှောက်ရင်း တောင်တက်ခရီးသွားချင်သူတွေဟာ လေဆိပ်ရှိရာ ပူတာအိုမြို့ကနေတဆင့် သွားလာကြရပါတယ်။ ရာဇီ ဆိုတာက တောင် လို့ အဓိပ္ပါယ်ရှိပြီး ဖြစ်တဲ့အတွက် ဖုန်ကန်တောင် လို့ ဒေသတွင်းမှာတော့ ပြောဆိုကြပါတယ်။ ရေခဲတောင်ဆိုပေမဲ့ နွေအလွန်ကာလနဲ့ မိုးကာလတွေမှာတော့ အခုအခါ ရေခဲမရှိတဲ့အခြေအနေမျိုးဖြစ်ပြီး ရေခဲနှင်းတွေမြင်တွေ့ဖို့ တောင်ပေါ်အတက်သင့်ဆုံးအချိန်ဟာ နိုဝင်ဘာလ ကနေ ဧပြီလ အတွင်းပဲ ဖြစ်ပါတယ်။ မိုးရွာတဲ့အချိန်တွေ ရှောင်ပြီးတက်သင့်ပါတယ်။ ဖုန်ကန် အပါအဝင် ဒီဒေသတစ်ဝိုက်မှာ တောင်တက်ခရီးသွားသူတွေ သဘောတကျ တက်ကြတဲ့ ရေခဲတောင်များစွာ ရှိပါတယ်။ ဖုန်ကန်ကတော့ အလွယ်ကူဆုံးလို့ ဆိုရလောက်အောင် တက်ရတဲ့လမ်း ကြမ်းတမ်းမှုအနည်းဆုံး နဲ့ အန္တရာယ်ကြုံနိုင်ချေအနည်းဆုံး ပါ။ သို့သော်လည်း အခြေအနေတိုင်းဟာ ကိုယ့်ရဲ့ သတိ နဲ့ အသိပေါ် မူတည်နေတာမို့ လမ်းပြတွေနဲ့ စနစ်တကျ သွားလာတာမျိုး မဖြစ်မနေ လုပ်ဆောင်သင့်ပါတယ်။
.
ဖုန်ကန်ရေခဲတောင် တက်ဖို့ စိတ်ဝင်စားသူတွေ၊ တောင်တက်ခရီးအကြောင်း လေ့လာလိုသူတွေအတွက် ကျွန်တော်ကိုယ်တိုင် ဖုန်ကန်တောင်တက်ရင်း ကြုံခဲ့သမျှကို အရှိအတိုင်း ရိုက်ကူးထားတဲ့ ဖုန်ကန်ခရီးစဉ်ကို တင်ဆက်လိုက်ပါတယ်။ တောင်တက်ခရီးစဉ်ဟာ ရက်ရှည်တဲ့အတွက် တစ်ပိုင်းတည်း တင်ဆက်ဖို့ ခက်ခဲတာမို့ Series အနေ အပိုင်းလိုက် တင်ဆက်ပေးလိုက်ပါတယ်ခင်ဗျာ။ ခရီးစဉ်အတွက် လိုအပ်တာတွေကို ဒီဗီဒီယိုတွေကြည့်ရင်း ခန့်မှန်းတွက်ဆနိုင်မယ်လို့ ယုံကြည်ပါတယ်။
.
အခု အပိုင်း (၁) မှာတော့ ပူတာအိုမြို့ကို ရောက်ရှိခြင်းကနေ ရေခဲတောင်တက်ဖို့ တောင်ခြေရွာ ဇီယာဒမ်း ကို သွားတဲ့အတွေ့အကြုံတွေကို တင်ဆက်ထားပါတယ်ခင်ဗျာ။
.
အားလုံးပဲ အမြဲ ဘေးကင်း ကျန်းမာ ရွှင်လန်းကြပါစေ...
သီဟလုလင် (Thiha, the Traveller)
5 окт 2024
