မင်းသားကြီးအောင်လွင်သည် ရုပ်ရှင်လောက ဖြတ်သန်းမှုအတွေ့အကြုံ နှစ်ပေါင်း ၅၀ ကျော်ရှိပြီဖြစ်သည်။ သူသည် မင်းသားကြီး ဝင်းဦး၊ ဒါရိုက်တာကြီး ရွှေဒုံးဘီအောင်၊ ဒါရိုက်တာ ဦးတင်ယု အစရှိသည့် မြန်မာ့ရုပ်ရှင်လောက၏ ဂန္ထဝင်ကြီးများနှင့် လက်ပွန်းတတီး တွဲဖက်လုပ်ကိုင် ပညာသင်ယူခွင့်ရရှိခဲ့သည်။
ဦးအောင်လွင်သည် သရုပ်ဆောင်သက်သက်သာမဟုတ် ဇာတ်ညွှန်းဆရာ၊ ဒါရိုက်တာလည်းဖြစ်ကာ သူရိုက်ကူး၍ ကိုယ်တိုင်ပါဝင်သရုပ်ဆောင်ခဲ့သည့် တိမ်လွှာမို့မို့လွင်ဇာတ်ကား၊ နေခြည်ဖြာမှနွေးသော်ကြောင့်ဇာတ်ကားတို့မှာ လူသိများ ထင်ရှားသည်။
ဦးအောင်လွင်သည် သရုပ်ဆောင်နှင့် ဒါရိုက်တာမဖြစ်မီ ရုပ်ရှင်ကားဖြတ် ကားဆက်သမားဘဝဖြင့်အစပြုခဲ့ပြီး မှတ်တမ်းရေးသူအဖြစ်လည်း လုပ်ကိုင်ခဲ့သဖြင့် အောက်သက်ကြေသူ ရုပ်ရှင်ပညာရှင်ကြီးဖြစ်သည်။
17 сен 2024
