ရန်ကုန်ဆေးရုံကြီးရဲ့ ကျက်သရေဆောင်ဝန်ထမ်းကြီး 

သူ့နာမည်က ဦးတင်ဝင်းပါ။ သူ့ကို ကျန်းမာရေးကောင်းတဲ့လူတွေ သိချင်မှသိကြမှာဖြစ်ပေမယ့် ရန်ကုန်ဆေးရုံကြီး အဆုပ်နဲ့ရင်ခေါင်းဌာနကို ရောက်ခဲ့ဖူးတဲ့ လူနာတိုင်းကတော့ သူ့ကို သိပါတယ်။ အထူးသဖြင့် အစိုးရဆေးရုံတွေကိုအားကိုးနေရတဲ့ လူနာ အတော်များများအတွက် အားကိုးချစ်ခင်ရတဲ့ လူတယောက်လို့ဆိုရင် ဦးတင်ဝင်းအကြောင်း လျှော့လျှော့ပေါ့ပေါ့ ပြောထားတာပဲဖြစ်ပါလိမ့်မယ့်။
ရန်ကုန် ခုတင် ၅၀၀ ဆန့် အထူးကုဆေးရုံကြီး၊ အဆုတ်နဲ့ ရင်ခေါင်းခွဲစိတ်အထူးကုဌာနက ဆေးရုံအုပ်ကြီး ဒေါက်တာထက်မြတ်ကဆိုရင် ဦးတင်ဝင်းသည် ဆေးရုံရဲ့ ကျက်သရေဆောင်ဝန်ထမ်းဖြစ်တယ်လို့တောင် ဂုဏ်ပြုညွှန်းဆိုပါတယ်။
အဲ့ဒီလောက် အားကိုးရတဲ့ ဦးတင်ဝင်းက ဒီဆေးရုံမှာ ဘာတာဝန်တွေလုပ်ပေးရတာပါလဲ။ အမှန်တော့ ဦးတင်ဝင်းဟာ ဆေးရုံအခေါ် အထွေထွေလုပ်သားတဦးသာဖြစ်ပါတယ်။ ဒါပေမဲ့ လူနာတွေကို အောက်ဆီဂျင်တပ်ပေးရတဲ့နေရာလည်း သူပါတယ်။ လူနာစောင့်မပါတဲ့ လူနာတွေအတွက် ထမင်းထုပ်တန်းစီးရတဲ့နေရာလည်း သူပါတယ်။ ရေအိမ်နဲ့ ရေချိုးခန်းသန့်ရှင်းရေးလုပ်တာ၊ ခုတင်နဲ့ ထိုင်ခုံတွေ သယ်ရွှေ့ပေးတာအဆုံး သူပါပါတယ်။
ဦးတင်ဝင်းရဲ့ ရိုးသားမှုကိုပေါ်လွှင်စေတဲ့ဖြစ်ရပ်တခု ၂၀၁၄ ခုနှစ်အတွင်းက ဖြစ်ခဲ့ပါတယ်။ လူနာရှင်တယောက်မေ့ကျန်ခဲ့တဲ့ ငွေကျပ် ၇ သိန်းကျော်ပါတဲ့ပိုက်ဆံအိတ်ကို ဦးတင်ဝင်းကတွေ့ရှိခဲ့ပြီး ပိုင်ရှင်လက်ထံ ပြန်လည်ပေးအပ်ပေးခဲ့တဲ့ဖြစ်ရပ်ပဲဖြစ်ပါတယ်။ လူနေခြုံကြား စိတ်နေဘုံဖျားလို့ဆိုရမယ့် ဦးတင်ဝင်ရဲ့ ရိုးသားဖြောင့်မတ်မှုကို ဂုဏ်ပြုတဲ့အနေနဲ့ ပြည်တွင်း သတင်းမီဒီယာအချို့မှာ ဒီဖြစ်ရပ်အကြောင်း တခမ်းတနား ဖော်ပြခဲ့ဖူးပါတယ်။
ဦးတင်ဝင်းနဲ့ လူနာရှင်တွေကြားမှာ ဆက်ဆံရေးက ဘယ်လိုပါလဲ။
ရိုးသားဖြောင့်မတ်တဲ့အပြင် လုပ်ငန်းခွင်မှာ အားကိုးရလွန်းတဲ့စံပြလုပ်သားကြီးဖြစ်တဲ့အတွက် သက်ပြည့်ပင်စင်ယူပြီးတာတောင်မှ ပြန်လည်ခေါ်ယူခန့်အပ်ထားရတဲ့အထိဖြစ်ပါတယ်။ ဦးတင်ဝင်းရဲ့ လခအတွက် ကျန်းမာရေးဝန်ထမ်းနဲ့ ဆရာဝန်ကြီးတွေရဲ့ အိတ်စိုက်ငွေထဲက ပေးနေတာပါ။
တကယ်တော့ ဦးတင်ဝင်းရဲ့ အဖေဟာ ရန်ကုန်ဆေးရုံကြီးမှာ အထွေထွေလုပ်သားလုပ်ခဲ့သလိုပဲ ဦးတင်ဝင်းရဲ့ အဖိုးဟာလည်း ထိုနည်းလည်ကောင်း အထွေထွေလုပ်သားအဖြစ် လုပ်ခဲ့တာကြောင့် ဦးတင်ဝင်းတို့ဟာ အဖိုး၊ အဖေနဲ့ သားဖြစ်သူကိုစိုးဝင်းအထိ မျိုးဆက် ၄ ဆက်တိုင်အောင် အများပြည်သူ ကျန်းမာရေးကဏ္ဍမှာ အုပ်တချပ် သဲတပွင့်ပါဝင်ခဲ့ပေမယ့် တမိသားစုလုံးရဲ့ နိုင်ငံသားစိစစ်ရေးကတ်ပြားအတွက် လျှောက်ထားဆဲ၊ စိစစ်ဆဲအဆင့်မှာပဲရှိပါသေးတယ်။ ဒီကာလတလျှောက် ဆေးရုံကထုတ်ပေးထားတဲ့ ဝန်းထမ်းအသိအမှတ်ပြုကတ်နဲ့သာ မိသားစုရေးရာတွေကို ဆောင်ရွက်ခဲ့ရတပါ။
ဒီတပတ်မှာတော့ ဆေးရုံကလက်မလွှတ်နိုင်တဲ့အထိ အားကိုးရတဲ့ ဝန်ထမ်းကောင်းကြီးတဦး၊ ရိုးသားဖြောင့်မတ်တဲ့ လူပုဂ္ဂိုလ်တဦးဖြစ်တဲ့ ဦးတင်ဝင်းအကြောင်းကို ရုပ်ရှင်တေးကဗျာနဲ့ News Watch သတင်းဌာနက ဂုဏ်ယူစွာနဲ့ ရိုက်ကူးတင်ဆက်ပေးလိုက်ရပါတယ် ခင်ဗျား။