လားရှိုး ရမခ ကို သိမ်းစဉ် ဖမ်းမိတဲ့ စစ်သုံ့ပန်းတွေထဲက လူ(၁၀၀၀)ကျော်ကို အသုတ်ခွဲပြီး ပြန်လွတ်ပေး၊ 

မှူးအိန်ဂျယ်လ်/MFP၊ ဩဂုတ် - ၈
ရှမ်းပြည်မြောက်ပိုင်း၊ လားရှိုးမြို့ အခြေစိုက် အရှေ့မြောက်တိုင်း စစ်ဌာနချုပ် - ရမခ ကို MNDAA ဦးဆောင်တဲ့ ပူးပေါင်းတပ်က သိမ်းပိုက်စဉ် ဖမ်းမိထားတဲ့ စစ်သုံးပန်းနဲ့ မိသားစုဝင်တွေထဲက စုစုပေါင်း လူ(၁၀၀၀)ကျော်ကို ပြန်လွတ်ပေးခဲ့တယ်လို့ MNDAA နဲ့ PDF တပ်ပေါင်းစု ရှေ့တန်း သတင်းရင်းမြစ်က ပြောပါတယ်။
ရမခကို သိမ်းပိုက်စဉ် ဖမ်းမိသူတွေထဲက ဩဂုတ်(၆)ရက်မှာ (၃၈၅)ဦး၊ ဩဂုတ်(၇)ရက်မှာ (၄၄၅)ဦးနဲ့ ဩဂုတ်(၈)ရက် ဒီနေ့မှာ (၃၀၈)ဦးကို လွှတ်ပေးခဲ့တာ ဖြစ်ပြီး ရှမ်းပြည်တိုးတက်ရေးပါတီ/ရှမ်းပြည်တပ်မတော် ‌SSPP/SSAကလည်း ပူးပေါင်း ကူညီခဲ့တယ်လို့ ဆိုပါတယ်။
"ကျွန်တော်တို့ PDF တပ်ပေါင်းစုတွေနဲ့ MNDAA ကိုးကန့်တပ်ဖွဲ့မှ လားရှိုး (ရမခ) သိမ်းပိုက်ခဲ့စဉ်က ဖမ်းဆီး ရမိခဲ့တဲ့ စစ်သုံ့ပန်း မိသားစုတွေကို နေ့စဉ် လွတ်ပေးနေတဲ့ နေရာမှာ မနေ့ (ဩဂုတ်-၆)က (၃၈၅)ယောက်၊ ဩဂုတ်(၇)ရက်မှာ (၄၄၅)ယောက် လွတ်ပေးလိုက်ပါတယ်။ စစ်သုံ့ပန်း မိသားစုတွေကို လွတ်ပေးတဲ့ လုပ်ငန်းစဉ်မှာ SSPP မှလည်း လာရောက် ပူးပေါင်း ကူညီ ဆောင်ရွက် ပါဝင်ပေးပါတယ်။ ဒီနေ့ (၃၀၈) ဦးကို လွှတ်ပေးလိုက်ပါတယ်။ လွှတ်ပေးတဲ့အခါ အရင်နေ့တွေလိုပဲ SSPP မှ လာရောက် ခေါ်ယူပေးပါတယ်"
စစ်သုံ့ပန်းမိသားစု တစ်ဦးကို ခရီးစရိတ် ကျပ်(၅၀၀၀၀)ပေးပြီး ပြန်လွှတ်ပေးခဲ့တာလို့ MNDAAက ဆိုပါတယ်။
"MNDAA တပ်သည် အာဏာသိမ်း တပ်၏ တပ်သားမိသားစု ဝင်များကို လွှတ်ပေးခဲ့ပြီး ၎င်းတို့ တစ်စုစီအတွက် ခရီးစရိတ် ၅၀၀၀၀ ကျပ် ပေးခဲ့သည်" လို့ MNDAA က ဩဂုတ်(၈)ရက် မနေ့က ထုတ်ပြန်ပါတယ်။
အာဏာသိမ်း စစ်အုပ်စု လက်အောက်ခံ တိုင်းစစ်ဌာနချုပ် (၁၄)ခုအနက် လားရှိုးမြို့ အခြေစိုက် အရှေ့မြောက်တိုင်း စစ်ဌာနချုပ် (ရမခ)ကို ကိုးကန်းတပ် MNDAA နဲ့ တော်လှန်ရေး ပူးပေါင်းတပ်တွေက ဇူလိုင်(၃)ရက်မှာ စတင် ထိုးစစ်ဆင် တိုက်ခိုက်ပြီး တစ်လအကြာ ဩဂုတ်(၃)ရက်မှာ အလုံးစုံ သိမ်းပိုက်နိုင်ခဲ့တာပါ။
ရခမ တိုက်ခိုက်ပွဲကနေ ထောင်ချီတဲ့ စစ်သုံ့ပန်းတွေ ဖမ်းမိသလို စစ်အုပ်စုရဲ့ ဗိုလ်ချုပ်အဆင့်၊ ဗိုလ်မှူးချုပ်အဆင့်နဲ့ ဗိုလ်မှူးကြီး အဆင့်တွေကိုလည်း ဖမ်းမိထားပါသေးတယ်။
#Mandalay_Free_Press_MFP