စစ်ကောင်စီဆီကို သတင်းပေးတယ်ဆိုတဲ့ စွပ်စွဲချက်နဲ့ စစ်ရေးနဲ့မပတ်သက်တဲ့ အရပ်သားပြည်သူတွေကို MNDAA က ဖမ်းဆီးထားပြီ သေဒဏ်ပေးမယ်လို့ ပြောဆိုထားတာဟာ လူ့အခွင့်အရေးချိုးဖောက်မှုကျူးလွန်တာ ဖြစ်တယ်လို့ နိုင်ငံရေးလေ့လာသုံးသပ်သူတွေက ပြောပါတယ်။
ရှမ်းပြည်နယ်မြောက်ပိုင်းကို ၁၀၂၇ စစ်ဆင်ရေးဆိုတဲ့နာမည်နဲ့ ပစ်ခတ်တိုက်ခိုက်မှုတွေလုပ်ဆောင်ခဲ့တဲ့ ကိုးကန့် အကြမ်းဖက်သောင်းကျန်းသူ MNDAA ဟာ ကိုးကန့်ဒေသအပြင် ရှမ်းပြည်နယ်မြောက်ပိုင်းရဲ့မြို့တော်လည်းဖြစ် တိုင်းစစ်ဌာနချုပ်လည်းရှိတဲ့ လားမြို့ကို “ဝ” UWSA ရဲ့ စစ်ပစ္စည်း စစ်သည် အကူအညီတွေအပြင် ညီနောင်မဟာမိတ်အဖွဲ့တွေရဲ့စစ်ရေးအကူအညီတွေနဲ့အတူ တိုက်ခိုက်ထိန်းချုပ်ထားလိုက်တာဖြစ်လို့ အဲ့ဒီက ဒေသခံအများအပြားဟာ နေရပ်စွန့်ခွာ ထွက်ပြေးတိမ်းရှောင်နေကြရတာဖြစ်ပါတယ်။
စစ်ပွဲတွေကြောင့် ဒေသခံပြည်သူတစ်ချို့ နေရပ်စွန့်ခွာထွက်ပြေးနေကြရပေမယ့် မြို့ခံတစ်ချို့ကတော့ မြို့ကိုမစွန့်ခွာပဲ လက်ရှိအချိန်အထိ မြို့မှာပဲနေထိုင်နေကြပါသေးတယ်။
ပြီးခဲ့တဲ့ လ ကစလို့ ကိုးကန့်အကြမ်းဖက်သောင်းကျန်းသူတွေအပါအဝင် ပလောင်နဲ့ ရခိုင် လက်နက်ကိုင်သောင်းကျန်းသူတွေကို တပ်မတော်က အကြမ်းဖက်အဖွဲ့အဖြစ်ကြေညာလိုက်ပြီးတဲ့နောက် လားရှိုးမြို့ကို တပ်မတော်လေက ထိရောက်တဲ့ လေကြောင်းပစ်ကူ ၁၅ ကြိမ်ထက်မနည်းပစ်ခတ်ခဲ့လို့ ရာနဲ့ချီတဲ့ ကိုးကန့်သောင်းကျန်းသူ သေဆုံးတာတွေ ဒဏ်ရာရရှိသူတွေလည်းအများအပြားရှိခဲ့သလို အဲ့ဒီအထဲမှာ တပ်မဟာမှုးတစ်ချို့လည်း သေဆုံးတာတွေရှိခဲ့ပေမယ့် အလောင်းဖျောက်ဖျက် ရှင်းလင်းမှုတွေပြုလုပ်ပြီး သေဆုံးသူစာရင်းကို အတိအကျမထုတ်ပြန်ခဲ့ပါဘူး။
စက်တင်ဘာလ ၇ ရက်နေ့နဲ့ ၈ ရက်နေ့ကစပြီး လေကြောင်းပစ်ခတ်မှုတွေကိုအလူးအလဲခံနေရတဲ့ ကိုးကန့်သောင်းကျန်းသူတွေဟာ မြို့ကနေမစွန့်ခွာပဲ မြို့တွင်းမှာနေထိုင်တဲ့ တိုင်းရင်းသားတစ်ချို့ကို စစ်ကောင်စီသတင်းပေးဆိုတဲ့စွပ်စွဲချက်တွေနဲ့ မတရားဖမ်းဆီးပြီး လူ့အခွင့်အရေးချိုးဖောက်မှုတွေကျူးလွန်တဲ့လုပ်ရပ်ဖြစ်တဲ့ သေဒဏ်ချမှတ်တာတွေလုပ်ဆောင်နေပါတယ်။
“သူတို့က သတင်းပေးလို့ စွပ်စွဲပြီး သတ်ဖို့လုပ်နေတယ်။ ခုဖမ်းသွားတာက ဘာမှနားမလည်တဲ့သူတွေ၊ သူတို့သတင်းပေးရအောင်လည်း ဖုန်းလိုင်းရောအင်တာနက်လိုင်းပါဖြတ်တောက်ထားတာ မီးကလည်းမရဘူး ဘယ်လိုသတင်းပေးမလဲ၊ အဓိပ္ပါယ်မရှိဘူး။ ဒါက ကြွက်မနိုင်ကျည်မီးရှို့တဲ့သဘောပဲ။ အကြောက်တရားသွင်းတဲ့သဘောပဲလေ၊ လက်နက်ကိုင်ပြီးအကြောက်တရားနဲ့အုပ်ချုပ်တာပေါ့၊ ဒါက သူပုန်တွေရဲ့နယ်မြေတွေမှာ ဒီအတိုင်းပါပဲ”လို့ ကိုးကန့်သောင်းကျန်းသူတွေရဲ့ မတရားစွပ်စွဲမှုတွေနဲ့ပတ်သက်ပြီး မြို့ခံတစ်ဦးက ခုလို ပြောပါတယ်။
“တပ်ကို သတင်းပေးတယ်ဆိုပြီး အယောက် (၃၀)ဖမ်းထားတယ် ပြီးတော့ မြို့ပတ်ပြမယ်လို့ပြောတယ်။ ပြီးတော့ သေဒဏ်ပေးမယ်လို့ပြောတယ် ပေါ့နော် ခုထိတော့ဘာမှမလုပ်ရသေးဘူး ဘယ်မှာထားထားလဲတော့မသိဘူး”လို့လည်း သူကပြောပါတယ်။
လားရှိုးမြို့က ကိုးကန့်သောင်းကျန်းသူတွေခိုအောင်နေတဲ့နေရာတွေကို တပ်မတော်လေက တိကျတဲ့ပစ်ခတ်မှုတွေကြောင့် MNDAA အများအပြားသေဆုံးနေတာဖြစ်လို့ စစ်ကောင်စီကို ဒေသခံတွေကသတင်းပေးတယ်ဆိုတဲ့စွပ်စွဲချက်ဟာ ရေဘူယျဆန်တဲ့စွပ်စွဲချက်သာဖြစ်သလို တပ်မတော်မှာ သောင်းကျန်းသူလှုပ်ရှုားမှုတွေနဲ့ပတ်သက်ပြီးထောက်လှမ်းနိုင်တဲ့ ဂြိုလ်တုထောက်လှမ်းရေးစနစ်လည်း ရှိနေနိုင်တယ်လို့ စစ်ရေးသုံးသပ်သူတွေကပြောဆိုထားပါတယ်။
သူတို့က တောင်ဖမ်း မြောက်ဖမ်း လိုက်ဖမ်းနေတာ ဒါက ရေဘူယျဆန်တဲ့ လုပ်ဆောင်ချက်ပဲ၊ တပ်မတော်မှာက ဂြိုလ်တုကနေပြီးတော့ တိုက်ရိုက်ထောက်လှမ်းနိုင်တဲ့စနစ် ရှိနေနိုင်တယ်။ နောက်တစ်ခုက လေကြောင်းကင်းထောက်မှုတွေလည်းရှိတယ်၊ နောက်ဖြစ်နိုင်တာက တရုတ်ရဲ့နောက်ကွယ်ကနည်းပညာပံ့ပိုးမှု ဒါလည်း ရှိနိုင်တာပဲ လူဖမ်းပြီးသတ်ပြတာက ဒါကလူ့အခွင့်အရေးချိုးဖောက်မှုသက်သက်ပဲလို့ပဲပြောရမယ်လို့ မြန်မာ့စစ်ရေးလေ့လာစောင့်ကြည့်သူတစ်ဦးကပြောပါတယ်။
တရုတ်နိုင်ငံခြားရေးဝန်ကြီးဌာန အာရှရေးရာ အထူးကိုယ်စားလှယ် မစ္စတာတိန့်ရှီးကျွင်း နဲ “ဝ” တပ်ဖွဲ့ UWSA ထိပ်ပိုင်းခေါင်းဆောင်တို့ တရုတ်နိုင်ငံယူနန်ပြည်နယ်မှာ ပြုလုပ်ခဲ့တဲ့ အစည်းဝေးရဲ့ မှတ်တမ်း ပေါက်ကြားခဲ့ပြီး အဲ့ဒီအစည်းအဝေးမှတ်တမ်းအရ ဝ တပ်ဖွဲ့ UWSA အနေနဲ့ အကြမ်းဖက်တွေဖြစ်တဲ့ ညီနောင်မဟာမိတ်တွေနဲ့ PDF တွေကို လက်နက်ခဲယမ်း မရောင်းချဖို့ ပြောဆိုထားသလို ကိုးကန့် ထိန်းချုပ်တဲ့ဒေသတွေနဲ့ အဲဒီဒေသတွေက နယ်စပ်ဂိတ်တွေကိုပါ ဖြတ်တောက်ပိတ်ဆို့ဖို့တွေလည်း ပါဝင်နေပါတယ်။
တရုတ်နိုင်ငံရဲ့ဖိအားပေးမှုတွေ ညှိနှိုင်းမှုတွေကို MNDAA နဲ့ မဟာမိတ်တွေဖြစ်တဲ့ TNLA / AA တွေက လိုက်ပါဆောင်ရွက်တာမရှိခဲ့ရင် လားရှိုးနဲ့ ရှမ်းမြောက်ဒေသမှာတိုက်ပွဲတွေပြင်းထန်လာနိုင်သလို လာရှိုးမြို့အပြင် လက်ရှိထိန်းချုပ်ထားတဲ့ဒေသတွေကို ပြန်လည်လက်လွှတ်ရနိုင်ဖွယ်ရှိတယ်လို့လည်း အမည်မဖော်လိုတဲ့ နိုင်ငံရေးလေ့လာသုံးသပ်သူတစ်ဦးက ပြောဆိုထားတာဖြစ်ပါတယ်။
9 окт 2024