လည်ပင်းထဲမှာ တစ်ဆို့ဆို့ ဖြစ်ပြီး အစာမျိုရခက်လာတတ်ပါသလား။ ခဏခဏ အစာနင်တာ၊ သီးတာတွေ ဖြစ်နေသလား။ လေချဉ်တက်တာက ပိုဆိုးလာနေသလား။ ဒါဆိုရင်တော့ ကျွမ်းကျင်သူဆရာဝန်ကို ပြပြီ အစာရေမျိုပြွန်ကင်ဆာ ရှိမရှိ ဆိုတာကို အမြန်ဆုံး စမ်းကြည့်သင့်ပါတယ်။
ပြီးခဲ့တဲ့ ရက်ပိုင်းက စာရေးဆရာ အကြည်တော် အစာရေမျိုပြွန်ကင်ဆာရောဂါနဲ့ ကွယ်လွန်သွားခဲ့အပြီးမှာ အစာရေမျိုပြွန်ရောဂါကြောင့် ဖခင်၊ ဦးလေး၊ အစ်ကို၊ မောင် မိသားစုဆွေမျိုး ဆုံးပါးခဲ့ရသူ အတော်များများကလည်း ဒီရောဂါအကြောင်း လူမှုကွန်ရက်ပေါ်ကနေ ပြန်ဝေမျှ လာခဲ့ကြတာပါ။
အစာရေမျိုပြွန်ကင်ဆာဟာ မြန်မာနိုင်ငံမှာ အဖြစ်များတဲ့ ကင်ဆာတွေထဲမှာ တစ်ခုအပါအဝင် ဖြစ်ပြီး အချိန်မီမကုမိတဲ့အတွက် သေဆုံးမှုနှုန်းလည်း များတဲ့ ရောဂါဖြစ်ပါတယ်။ အစာရေမျိုပြွန်ကင်ဆာရဲ့ ရောဂါလက္ခဏာတွေနဲ့ ဘယ်လို ကြိုတင်ကာကွယ်သင့်သလဲ ဆိုတဲ့အကြောင်းတွေကို ယူကေနိုင်ငံက အစာအိမ်၊ အူလမ်းကြောင်း၊ အသည်းနဲ့ အထွေထွေရောဂါကု သမားတော်ကြီး ဒေါက်တာ စုစုမြတ်က ဘီဘီစီရဲ့ ကျန်းမာရေးရာ Health Matters အစီအစဉ်မှာ ရှင်းပြထားပါတယ်။
ဘီဘီစီမြန်မာပိုင်း
29 авг 2024