၂၀၂၂ ခုနှစ် နိုဝင်ဘာ ၁၇ ရက်နေ့ အမျိုးသားနေ့မှာ စစ်ကောင်စီက လွတ်ငြိမ်းချမ်းသာခွင့်နဲ့ ပြန်လွှတ်ပေးခဲ့ပြီး ပြည်နှင်ဒဏ်ပေးခဲ့တဲ့ အမေရိကန်နိုင်ငံသား ဦးကျော်ဌေးဦးဟာ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်း စုကြည်ရဲ့ လရောင်တော စီမံကိန်းမှာ စိုက်ပျိုးရေးတာဝန်ခံအဖြစ် တာဝန်ယူဆောင်ရွက်ခဲ့သူဖြစ်သလို ဒေါ်အောင်ဆန်းစုကြည် ယုံကြည်အားကိုးရတဲ့ ရင်းနှီးသူတစ်ဦးလည်း ဖြစ်ပါတယ်။ သူ့ကိုစစ်ကောင်စီက အာဏာသိမ်းပြီး ၇ လကျော်အကြာ ၂၀၂၁ ခုနှစ် စက်တင်ဘာ ၁၃ ရက်မှာဖမ်းဆီးခဲ့ပြီး အကြမ်းဖက်တိုက်ဖျက်ရေးဥပဒေ ပုဒ်မ ၅၂ (က)၊ လဝက အက်ဥပဒေ တို့နဲ့ တရားစွဲဆိုပြီး စုစုပေါင်း ထောင် ၈ နှစ်ချခဲ့ပါတယ်။ အခုအခါ လွတ်ငြိမ်းချမ်းသာခွင့်နဲ့ ပြန်လွတ်ပြီးနောက် အမေရိကန်ပြည်ထောင်စုကို ပြန်လည်ပို့ဆောင်ခံခဲ့ရတဲ့ ဦးကျော်ဌေးဦးနဲ့ ဘီဘီစီက မေးမြန်းခွင့်ရခဲ့ပါတယ်။
ဒီအင်တာဗျူးမှာ အာဏာမသိမ်းခင်ရက်ပိုင်းအလိုက ဒေါ်အောင်ဆန်းစုကြည် မှာကြားချက်၊ စစ်တပ်အာဏာသိမ်းမှာ ဒေါ်အောင်ဆန်းစုကြည် ကြိုတင်သိရှိခဲ့ပါသလား၊ ကြိုတင်ပြင်ဆင်ခဲ့မှု ရှိမရှိနဲ့ စစ်တပ်အာဏာသိမ်းမှုအပေါ် ဒေါ်အောင်ဆန်းစုကြည်ရဲ့တုံ့ပြန်ချက်၊ ဦးကျော်ဌေးဦးကိုအာဏာသိမ်းပြီးလအတန်ကြာမှ စစ်ကောင်စီ ဘာကြောင့်ဖမ်းဆီးခဲ့တာလဲနဲ့ သူ့ရဲ့ စစ်ကြောရေးကာလအတွေ့အကြုံတွေကိုနားဆင်ရမှာဖြစ်ပါတယ်။
ဘီဘီစီမြန်မာပိုင်း
26 дек 2022
