ლიტერატურული გადაცემა „წახნაგები“ რუბრიკით Exegi monumentum („ძეგლი ავაგე“) გთავაზობთ საუბრის გაგრძელებას ლიტერატურის მუსიკალურ მხარეზე და მთავარ ქართველ პოეტზე, რომელმაც ამ დარგში მსოფლიო მწვერვალებს მიაღწია; გადაცემაში საუბარია ბგერების ღმერთზე, დიდ გალაკტიონზე. ამ პოეტისთვის უდიდესი მნიშვნელოვანი რამ არის ბგერწერა. ქართულ ლიტერატურაში, ამ თვალსაზრისით, მას ჰყავს ერთადერთი მასწავლებელი და ერთადერთი მეტოქე - რუსთველი. მოგეხსენებათ, ენამ იცის ე.წ. ონომაპოეტური სიტყვები, რომელთა ფორმა და შინაარსი არაშემთხვევით დამოკიდებულებაშია ერთმანეთთან: რაკრაკი, ჩუხჩუხი, ლუღლუღი და ა.ს. გალაკტიონის ამოცანაა ხელოვნურად შექმნას ონომატოპოეტიკა, რაც შეუძლებელი ამოცანაა, მაგრამ არა ჭყვიშელი გენიოსისთვის. რატომ იწყება მისი მთავარი კრებულის პირველივე ლექსი ბგერწერის შედევრით; ხომ არ არის ალიტერაციული ზეიმი მთელი წიგნის ანონსი; რა შეუძლია გალაკტიონს ფშვინვიერი ბგერებით; როგორ იყენებს ეს პოეტი სისინ-შიშინების დაპირისპირებას; როგორ ქმნის გალაკტიონი მსოფლიო ბგერწერის რეკორდს, ათმარცვლიან სტრიქონს, რომელშიც ცხრა ხმოვანი „ა“; მართლა შავია თუ არა ეს „ა“, როგორც ამას რემბო ამტკიცებდა; იცის თუ არა გალაკტიონმა, რას აკეთებს, როდესაც იგი ბგერებით წერს, ხატავს ლექსს, - ყველაფერ ამაზე იქნება საუბარი გადაცემაში.
30 авг 2021