სენაკის მუსიკალური ფესტივალის ფარგლებში, აკაკი ხორავას სახელობის სახელმწიფო დრამატულ თეატრში, დღეს, ახალგაზრდა მომღერლის - დათო კენჭიაშვილის შემოქმედებითი საღამო დაიმართა. ხალხური სულითა და მთის კოლორიტით დამუხტული სიმღერები საზოგადოებამ დიდი აღტაცებით მიიღო. დარბაზში მაყურებლის განსაკუთრებული სიმრავლე, დაუსრულებელი აპლოდისმენტები და მომღერლის სახელის სკანდირება საზოგადოებაში მის დიდ პოპულარობასა და ხალხის მისადმი განსაკუთებულ სიყვარულზე მეტყველებდა. ,,შენ ჩემო დიდო ტკივილო’’ - ტრაგიკულად დაღუპული მომღერლის თეონა ქუმსიაშვილის ეს სიმღერა დათომ სწორედ მას - ყრმობის მეგობარს მიუძღვნა. საზოგადოებამ წუთიერი დუმილით პატივი მიაგო ,,მთის ყვავილის’’ - ამქვეყნიდან უდროოდ გამქრალ უნიჭიერესი მომღერლის ხსოვნას. მომღერალმა გამოსვლებს შორის საინტერესოდ გასცა პასუხები მსმენელთა შეკითხვებს. მადლიერი მსმენელის ოვაციების ფონზე, კონცერტის ბოლოს, ფესტივალის კიდევ ერთი დაუვიწყარი საღამოს ავტორმა ტრადიციისამებრ ავტოგრაფი დატოვა სცენაზე გამოტანილ საფესტივალო ბანერზე და ულამაზესი კონცერტი ყველასთვის საყვარელი სიმღერით დაასრულა. საღამოს სენაკის მუნიციპალიტეტის გამგებელი გოჩა დგებუაძე და გამგებლის მოადგილე ნატო ფულარია ესწრებოდნენ.
24 апр 2016
