ወረብ ዘታኅሣሥ በዓታ
አመ ፫ ለዘታኅሣሥ
ይዌድስዋ ኵሎሙ ይዌድስዋ ኵሎሙ በበነገዶሙ፣
ወይብልዋ በሐኪ በሐኪ ማርያም ሐዳስዩ ጣዕዋ።
ፀቃውዕ ይውኅዝ እምከናፍርኪ ሀሊብ ወመዓር እምታሕተ ልሳንኪ፣
ወይቤላ ንዒ ንሑር ኀበ ደብረ ከርቤ ደብረ ገነት።
ገብርኤል መልአክ መጽአ ወዜነዋ ወዜነዋ ወዜነዋ ጥዩቀ፣
በዕንቈ ባሕርይ በዕንቈ ባሕርይ በዕንቈ ባሕርይ እንዘ ትፈትል ወርቅ።
ገብርኤል መልአክ መጽአ መልአክ መጽአ ወዜነዋ ወዜነዋ ጥዩቀ፣
በዕንቈ በዕንቈ ባሕርይ በዕንቈ በዕንቈ ባሕርይ እንዘ እንዘ ትፈትል ወርቅ።
እንዘ ዘልፈ ትነብር ውስተ ቤተ እግዚአብሔር፣
አስተርአያ መልአክ ዘኢኮነ ዘኢኮነ ከመ ቀዲሙ ኢኮነ።
ናሁ ተግህደ ልዕልናሃ ለወለተ ሐና፣
ኅብስተ ሕይወት ተፀውረ ኅብስተ ሕይወት ተፀውረ በማኅፀና።
ንጽሕተ ንጹሐን ከዊና እመ አምላክ፣
ውስተ ቤተ መቅደስ ነበረት በቅድስና ነበረት በቅድስና።
ሃሌ ሃሌ ሉያ ጽርሕ ንጽሕት ማርያም ተፈሥሒ ሀገረ እግዚአብሔር፣
ቅዱስ ቃል ይወጽእ እምኔኪ አዕላፍ መላእክት ይትለአኩኪ ወላዲተ አምላክ።
በጽሐ ሠናይ ወአልፀቀ ዘመን በጽሐ ሠናይ ወአልፀቀ ዘመን ወበዓላ ለቅድስት ማርያም፣
እንተ በላዕሌሃ ተመርዓወ ቃል አንጺሖ ሥጋሃ ላዕሌሃ ኀደረ።
ይቤላ መልአክ ተፈሥሒ ፍሥሕት ተፈሥሒ ፍሥሕት ይቤላ መልአክ፣
ቡርክት አንቲ እምአንስት አንጺሖ ሥጋሃ ኀደረ ላዕሌሃ ኀደረ።
ይመጽእ ላዕሌኪ መንፈስ ቅዱስ ኃይለ ልዑል ይጼልለኪ፣
አንጺሖ ሥጋሃ ኀደረ ላዕሌሃ ላዕሌሃ መንፈስ ቅዱስ።
አእመራ ዘካርያስ ከመ እሙ ለሰማያዊ ንጉሥ፣
እመ በግዕ ዘትነብር ቤተ መቅደስ።
15 окт 2024