កសិករ ឈិត ឈៀង ប្រាប់វិធីធ្វើ«ថ្នាំពុលធម្មជាតិ» ដែលមានប្រសិទ្ធការពារ-កម្ចាត់សត្វល្អិតចង្រៃលើបន្លែ 

ក្នុងរយៈពេលជិត១០ឆ្នាំ ដែលលោក ឈិត ឈៀង ប្រើប្រាស់ថ្នាំពុលកសិកម្មធម្មជាតិ និងជីកំប៉ុស លើដាំដុះបន្លែរបស់ខ្លួន ក្នុងទំហំផ្ទៃដី ជិតកន្លះហិកតា នៅខេត្តសៀមរាប។ បើកសិករវ័យ៥១ឆ្នាំរូបនេះ វត្ថុធាតុដើមដែលអាចផលិតថ្នាំពុលធម្មជាតិបាន និងមានប្រសិទ្ធភាព រួមមានស្លឹកល្ហុង បណ្តូលពេជ្រ ស្លឹកគ្រៃ ជីនាងវង ម្ទេស ស្តៅ និងទន្ទ្រាងខែត្រជាដើម។
កសិករជំនាញថ្នាំពុលធម្មជាតិរូបនេះ បានប្រាប់ពីរបៀបធ្វើថ្នាំពុលធម្មជាតិសម្រាប់ការពារ និងកម្ចាត់សត្វចង្រៃដូចជាពពួកមេអំបៅដង្កូវរយ ដង្កូវចោះផ្លែ កណ្តូប និងចៃ មានស្លឹកគ្រៃ៦គីឡូក្រាម ទន្ទ្រាងខែត្រ៥គីឡូក្រាម និងម្ទេស២ក្រាមចិញ្ច្រាំឬបុក លាយជាមួយទឹក១០លីត្រ ហើយផ្អាប់ទុកក្នុងរយៈពេល៧ទៅ១០ថ្ងៃ អាចប្រើប្រាស់បាន។ ដោយឡែកជីនាងវង អាចបង្ការ ឬការពារពីសត្វចង្រៃដែលមានពីងពាងក្រហម, ដង្កូវយោលទង, ស្រាំងទិចផ្លែ, ពពួកសត្វដែលកើតឡើងពីផ្សិត និងពពួកសត្វល្អិតទៀកគូផងដែរ។
លោក ឈិត ឈៀង បានអះអាងប្រាប់សារព័ត៌មានThmeyThmey25 ថា៖« ថ្វីដ្បិតការប្រើប្រាស់ថ្នាំធម្មជាតិលើបន្លែមិនអាចទទួលបានទិន្នផលច្រើនដូចការប្រើថ្នាំពុលគីមីក៏ពិតមែន ប៉ុន្តែបន្លែដែលប្រើថ្នាំពុលធម្មជាតិនេះ មានតម្លៃខ្ពស់ជាងបន្លែប្រើថ្នាំពុលគីមី ពី៣០០ ទៅ៥០០រៀលក្នុងមួយគីឡូក្រាម ឬមានតម្លៃលើសពីនេះ។ បើយើងទូទាត់គ្នាទៅគឺមិនខុសគ្នាប៉ុន្មានទេ ដោយបន្លែប្រើថ្នាំពុលគីមីទទួលបានទិន្នផលច្រើន ប៉ុន្តែលក់បានថោក ហើយបន្លែប្រើថ្នាំពុលធម្មជាតិទទួលបានទិន្នផលតិច ប៉ុន្តែលក់បានថ្លៃ»។
លោក ឈិត ឈៀង បានបញ្ជាក់ថា ការដាំដុះបន្លែដោយប្រើថ្នាំពុលធម្មជាតិ គឺធានាបាននូវសុវត្ថិភាពនៃសុខភាពខ្ពស់ដល់អ្នកបរិភោគ ពិសេសធានាសុវត្ថិភាពដល់អ្នកដាំដុះ។ ដោយឡែកការប្រើប្រាស់ថ្នាំពុល គីមីអ្នកដែលរងគ្រោះថ្នាក់មុនគេបង្អស់ និងធ្ងន់ធ្ងរ គឺកសិករដែលជាអ្នកដាំផ្ទាល់តែម្តង ហើយអ្នកទទួលទាន ជាអ្នករងគ្រោះបន្ទាប់ធ្ងន់ឬស្រាល ទៅតាមកម្រិតសារធាតុថ្នាំពុលគីមី ដែលមាននៅក្នុងបន្លែទាំងនោះ។ បើតាមកសិករដែលមានបទពិសោធន៍ដាំបន្លែជិត៤០ឆ្នាំរូបនេះ ក៏ធ្លាប់ពុលថ្នាំគីមី ពីការបាញ់កម្ចាត់សត្វចង្រៃនៅក្នុងចម្ការបន្លែខ្លួនឯងផងដែរ។ ការពុលពីថ្នាំពុលគីមីនេះ បានធ្វើឱ្យលោក ឈិត ឈៀង សម្រេចចិត្តបោះបង់ទាំងស្រុងនូវការប្រើប្រាស់ថ្នាំពុលគីមីលើការដាំបន្លែនានារបស់ខ្លួន ហើយងាកមកប្រើជីកំប៉ុស និងថ្នាំពុលធម្មជាតិវិញ នៅក្នុងឆ្នាំ២០១០៕
#ថ្នាំពុលធម្មជាតិ
#កម្ចាត់សត្វល្អិត
#កសិកម្ម
--------------------------------------------------------------------
ThmeyThmey News Social Media:
thmeythmey.com/
/ thmeythmey
/ thmeythmeyvideonews
/ thmeythmeynews
/ thmeythmey