គោលការណ៍សម្អាតផ្ទះ៖ គ្មានការអនុគ្រោះចំពោះការប្រើប្រាស់គ្រឿងញៀនក្នុងជួររដ្ឋាភិបាលនោះទេ បើរកឃើញត្រូវ 

គោលការណ៍សម្អាតផ្ទះ! សម្តេចធិបតី ហ៊ុន ម៉ាណែត មានប្រសាសន៍ថា គ្មានការអនុគ្រោះចំពោះការប្រើប្រាស់គ្រឿងញៀនក្នុងជួររដ្ឋាភិបាលនោះទេ បើរកឃើញត្រូវបណ្តេញចេញពីក្របខណ្ឌ
===============
ភ្នំពេញ៖ សម្តេចធិបតី ហ៊ុន ម៉ាណែត បានមានប្រសាសន៍ថា ទាំងមន្ត្រីរាជការស៊ីវិល កងកម្លាំងប្រដាប់អាវុធថ្នាក់ជាតិ និងថ្នាក់ក្រោមជាតិ ដែលរកឃើញថាប្រើប្រាស់ ឬពាក់ព័ន្ធនឹងគ្រឿងញៀន នឹងត្រូវបណ្តេញចេញពីក្របខណ្ឌរដ្ឋ។ នេះបើតាមការចុះផ្សាយរបស់សម្តេចធិបតីនាយករដ្ឋមន្រ្តី នាថ្ងៃទី២១ ខែកុម្ភៈ ឆ្នាំ២០២៤។
ក្នុងពិធីបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅឆ្នាំ២០២៤ របស់អាជ្ញាធរជាតិប្រយុទ្ធប្រឆាំងគ្រឿងញៀន និងផ្សព្វផ្សាយផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៩ សម្តេចធិបតីនាយករដ្ឋមន្ត្រី ហ៊ុន ម៉ាណែត បានគូសបញ្ជាក់ថា៖«ខ្ញុំទើបតែចុះហត្ថលេខាបទបញ្ជាថ្មីមួយជាមួយរដ្ឋាភិបាល ស្តីពីការពន្លាតនិងបោសសម្អាតគ្រឿងញៀនក្នុងជួររដ្ឋាភិបាល ពោលគឺមន្រ្តីដែលស្ថិតក្នុងក្របខណ្ឌណាដែលរកឃើញថាពាក់ព័ន្ធនឹងគ្រឿងញៀន នឹងត្រូវបណ្តេញចេញពីក្របខណ្ឌរដ្ឋ»។
«ក្នុងនាមយើងជាគំរូដល់ប្រជាពលរដ្ឋ! យើងត្រូវពង្រឹងវិន័យ រួមទាំងការឯកភាពក្នុងការអនុវត្ត។ ដូច្នេះ មន្រ្តីរាជការ ទាំងកងកម្លាំងប្រដាប់អាវុធ ទាំងស៊ីវិល ត្រូវមានក្របខណ្ឌវិន័យ ក្រមខណ្ឌសីលធម៌។ ជារួម យើងត្រូវចាប់ផ្តើមអនុវត្តសម្អាតផ្ទះយើងក្នុងរដ្ឋាភិបាលជាមុន ដែលនេះគឺជាគោលនយោបាយ អត់មានការអនុគ្រោះនៅក្នុងជួររដ្ឋាភិបាលទៀតទេ ចំពោះការប្រើប្រាស់គ្រឿងញៀន។ នេះជាការលើកឡើងបន្ថែមរបស់សម្តេចធិបតី ហ៊ុន ម៉ាណែត កាលពីថ្ងៃទី២០ ខែកុម្ភៈ ឆ្នាំ២០២៤នេះ៕