ទៅលេងបាត់ដំបង! កុំរំលង «ភ្នំសំពៅ,ភ្នំបាណន់,ប្រាសាទឯកភ្នំ និងជិះឡូរី» 

ខេត្តបាត់ដំបង ជាខេត្តមួយដែលសម្បូរដោយសក្ដានុពលទេសចរណ៍បែបធម្មជាតិ កែច្នៃ និងបែបវប្បធម៌ ដោយមានតំបន់ទេសចរណ៍ចំនួន៥៤កន្លែង ក្នុងនោះរាប់បញ្ចូលវត្តគំរូចំនួន១០ផងដែរ។ នេះបើតាមការបញ្ជាក់របស់ លោក អ៊ុច អ៊ុំភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង។
ថ្ងៃនេះសារព័ត៌មានថ្មីៗ២៥រាជធានី-ខេត្ត និងនាំលោកអ្នកទៅទស្សនាតំបន់ទេសចរណ៍ចំនួន៤កន្លែងដែលលោកមិនគួររំលងរួមមាន «ឡូរីជើងភ្នំបាណន់,ភ្នំបាណន់,ភ្នំសំពៅ និងប្រាសាទឯកភ្នំ»។
ចម្ងាយប្រមាណជាង២០គីឡូម៉ែត្រ នៅខាងស្តាំដៃ លោក-អ្នក នឹងបានឃើញស្លាកសញ្ញា «ឡូរីជើងភ្នំបាណន់» ក្រៅពីកម្សាន្តសប្បាយនៃការជិះឡូរី លោក-អ្នក នឹងបានទស្សនាទិដ្ឋភាពដ៏ស្រស់ស្អាតនៃជើងភ្នំនេះផងដែរ។ ចំពោះសំបុត្រនៃការជិះឡូរីនេះ ភ្ញៀវជាតិត្រូវអស់ ១ម៉ឺនរៀលក្នុងម្នាក់ និងភ្ញៀវអន្តរជាតិចំណាយ ២ម៉ឺនរៀល។ បន្ទាប់ពីជិះឡូរី លោក-អ្នកអាចបន្តឡើងភ្នំបាណន់ដែលមានកាំជណ្តើរប្រមាណ៣៥៨កាំ។ នៅលើភ្នំបាណន់មានប្រាសាទចំនួន៥ ដែលកសាងឡើងនៅសតវត្សទី១១។
បន្ទាប់ពីបានទស្សនាប្រាសាទទាំង៥ នៅលើកំពូលភ្នំបាណន់រួចក្រុមការងារសាព័ត៌មានថ្មីៗ២៥ បានសម្រាកញ៉ាំបាយ ម៉ោងប្រហែលជិត៣ យើងក៏បានបន្តដំណើរទៅ«ភ្នំសំពៅ»វិញម្តង។ «រមណីយដ្ឋានធម្មជាតិភ្នំសំពៅ» ដែលបណ្តុំដោយភ្នំសំខាន់ៗនៅក្បែជើងភ្នំសំពៅ និងបណ្ដុំរូងភ្នំទាំង១២ មានបង្កប់នូវជំនឿជាប់ទាក់ទងនឹងរឿងព្រេងនិទានខ្មែរ «ព្រះបាទរាជកុល និងនាងរំសាយសក់»។
រមណីយដ្ឋានប្រវត្តិសាស្ត្រ ដែលស្ថិតនៅឃុំភ្នំសំពៅ ស្រុកបាណន់ តាមបណ្តោយផ្លូវជាតិលេខ៥៧ ចម្ងាយ១២គីឡូម៉ែត្រពីទីរួមខេត្តបាត់ដំបង។ រមណីយដ្ឋានមួយនេះ ទាក់ទាញភ្ញៀវទេសចរជាតិ និងអន្តរជាតិច្រើនកុះករ ជាពិសេស នៅថ្ងៃឈប់សម្រាក។ ភ្ញៀវទេសចរអាចធ្វើដំណើរឡើងភ្នំសំពៅដោយថ្មើរជាង ដោយម៉ូតូ និងរថយន្តបាន លោកអ្នកទស្សនាសម្រស់ដ៏ស្រស់ស្អាតពីកំពូលភ្នំនេះផងដែរ។
នៅពេលល្ងាចប្រមាណជាម៉ោង៦ជាង លោក-អ្នក នឹងបានទស្សនាសត្វប្រជៀវ ដែលហើរចេញពីរូងភ្នំរាប់ម៉ឺនក្បាលផងដែរ។
ក្រៅពីតំបន់ទេសចរណ៍ទាំងនេះ លោក-អ្នក ក៏មិនគួររំលងរមណីយដ្ឋានវប្បធម៌ដែលមានវ័យចំណាស់ដែលមានចម្ងាយផ្លូវ ២២,២៩ គីឡូម៉ែត្រពីខេត្តបាត់ដំបង។ «រមណីយដ្ឋានប្រាសាទឯកភ្នំ» ប្រាសាទឯកភ្នំ ជារមណីយដ្ឋានទេសចរណ៍វប្បធម៌ ដ៏ចំណាស់មួយក្នុងខេត្តបាត់ដំបង ដែលបានសាងសង់ឡើងក្នុងសតវត្សរ៍ទី១១ ក្នុងរាជកាលព្រះសាទសូរ្យវរ្ម័នទី១ នាសម័យមហានគរ។ នេះបើតាមមន្ទីរទេសចរណ៍ខេត្តបាត់ដំបង។
ដើម្បីធ្វើដំណើរទៅកាន់រមណីយដ្ឋានទេសចរណ៍វប្បធម៌ប្រាសាទឯកភ្នំ ភ្ញៀវទេសចរអាចធ្វើដំណើរដោយ រថយន្ត ម៉ូតូ ប្រើរយៈពេលប្រមាណ២០នាទីប៉ុណ្ណោះ។ ប្រាសាទឯកភ្នំ មានទីតាំងនៅភូមិ តាគម ឃុំពាមឯក ស្រុកឯកភ្នំ ខេត្តបាត់ដំបង ចម្ងាយ ៧គីឡូម៉ែត្រ បែកចេញពីផ្លូវខេត្តលេខ P156 ត្រង់ម្ដុំភូមិថ្កូវ ឃុំក្ដុលដូនទាវ ស្រុកឯកភ្នំ ខេត្តបាត់ដំបង និងចម្ងាយ១២.២៩គីឡូម៉ែត្រ ពីទីរួមខេត្តបាត់ដំបង៕
#បាត់ដំបង
#ភ្នំបាណន់
#ប្រាសាទឯកភ្នំ
--------------------------------------------------------------------
ThmeyThmey News Social Media:
thmeythmey.com/
/ thmeythmey
/ thmeythmeyvideonews
/ thmeythmeynews
/ thmeythmey