របាំគោះអង្រែ ជារបាំប្រជាប្រិយមួយ ដែលតែងតែប្រារឰធ្វើបន្ទាប់ ពីរដូវច្រូតកាត់ហើយ គឺធ្វើដើម្បីថ្លែងអំណរគុណ និងការគោរពចំពោះព្រលឹងអារក្ខអ្នកតា ទាំងឡាយដែលនាំមកនូវភាព រុងរឿង និង ការលូតលាស់ដល់ការដាំដុះស្រូវ ។ របាំនេះគេសម្ដែងដោយប្រើប្រាស់ដុំឈើ អង្រែ ហើយនិងត្បាល់ ដែលកសិករតែងតែ យកវាមកបុកកម្ទេច សំបកគ្រាប់ស្រូវចេញ។
របាំប្រពៃណីមួយនេះ មានលេងនៅស្ទើរគ្រប់ស្រុកនៅទូទាំងប្រទេស ប៉ុន្តែរបាំនេះបាននៅសល់តិចតួច ដែលប្រឈមនឹងការបាត់បង់ ដោយពុំមានអ្នកចេះចាំលេងបានតាមទម្រង់ដើមឡើយ។ អ្នកស្រាវជ្រាវអះអាងថា ជាប្រភពដើមនៃរបាំគោះអង្រែ គឺនៅខេត្តឧត្តរមានជ័យ។ មកដល់ពេលនេះ អ្នកស្រុកនេះក៏មិនសូវមានអ្នកចេះចាំលេងល្បែងនេះដែរ។
សៀវភៅរបាំប្រជាប្រិយខ្មែរបញ្ជាក់ថា នៅក្នុងអតីតកាលកន្លងច្រើនទសវត្សទៅ ពេលគេរាំរបាំគោះអង្រែនេះ គេតែងច្រៀង និងទះដៃបង្កើតជាចង្វាក់ឲ្យអ្នករាំលោតលេងតាមនោះដែរ។ ចម្រៀងនោះ ជារបៀបឌឺដងស្នេហារវាងបុរស និងនារី ប៉ុន្តែចម្រៀងទាំងនោះ ស្ទើរបាត់បង់ទៅហើយ គឺពុំឃើញគេច្រៀងនៅពេលរាំគោះអង្រែទៀតទេ នៅសល់តែពាក្យស្រែកបន្ទរមួយម៉ាត់ពីរ ហើយទះដៃរំពង។ តាមឯកសារដដែលនេះបញ្ជាក់ថា របាំនេះមានចម្រៀងច្រើនបទច្រើនបែបណាស់ដែរ។
ការចងក្រងឯកសារពីរបាំគោះអង្រែ ត្រូវបានធ្វើឡើងបន្ទាប់ពីរបាំរបស់ពលរដ្ឋក្នុងតំបន់នេះត្រូវបញ្ចូលក្នុងបញ្ជីរបាំប្រពៃណីខ្មែរ ដោយដំឡើងឲ្យមានក្រុមរបាំ និងមានបទភ្លេងចម្រៀងប្រចាំរបាំនេះផងនៅក្នុងទសវត្សឆ្នាំ១៩៦០។ ចម្រៀងនេះច្រៀងពីការសម្រាកលំហែរបស់កសិករ ហើយនាំគ្នារាំគោះអង្រែ៕
ប្រភព៖
១. www.rfa.org/kh...
២. www.elibraryof...
My social media links:
👉 / chanrathasornblog
👉 / chanrathasorn
👉 / chanrathasorn
👉 t.me/chanratha...
15 окт 2024