ក្រោយពីកម្ពុជាបានបើកព្រំដែនទំនាក់ទំនងឡើងវិញជាមួយប្រទេសថៃឡង់នៅកណ្តាលឆ្នាំ១៩៧០ សម័យសាធារណរដ្ឋខ្មែរមកនោះ ពាណិជ្ជករភាពយន្តថៃបានធ្វើការទំនាក់ទំនងទិញសិទ្ធិយកភាពយន្តខ្មែរទៅបញ្ចាំងនៅប្រទេសថៃ ដោយដាក់បញ្ចាំងក្នុងភាពយន្តធំៗនៅក្រុងបាងកក និងតាមបណ្តាខេត្តជាច្រើនទៀតក្នុងប្រទេសថៃ។
តាមការសិក្សាយ៉ាងលំអិតរបស់ក្រុមដំណើរខ្មែរបានរកឃើញថា ក្នុងចំនោមខ្សែភាពយន្តខ្មែរជាច្រើនដែលចេញទៅបញ្ចាំងជាបន្តបន្ទាប់នៅប្រទេសថៃនោះ ភាពយន្តរឿង នាងនាគត្រាច់ចរ របស់ផលិតកម្មបញ្ចពណ៍ភាពយន្ត ជាខ្សែភាពយន្តទី១ដែលមានវត្ថមាននៅប្រទេសថៃនៅខែមិថុនា ឆ្នាំ១៩៧០ មានន័យថា មុនភាពយន្តរឿង ពស់កេងកង និងភាពយន្តរឿងកាកីទៅទៀត។
ភាពយន្តរឿង នាងនាគត្រាច់ចរ ជាភាពយន្តបុរាណប្រឌិតបែបគុននិយម ប្រយុទ្ធគ្នាលាយឡំនិងអភិនីហាយ៉ាងរស់រវើក វណ្ណកម្មដ៏សំរិតសំរាំងរបស់ផលិតកម្ម បញ្ចសិលាភាពយន្ត ក្រោមស្នាដៃនិពន្ធ និងដឹកនាំរឿងដោយ លោក ឯម សូណា និងលោក ឳ ឌុំ។ ភាពយន្តនេះប្រជុំតារាល្បីៗនៃកម្ពុជាមាន គីម ណូវ៉ា , លោក ជា យុទ្ធថន , លោក ឳ ឌុំ ,លោកស្រី សាក់ស៊ី ស្បោង , លោក សម សុផុន , លោក ណុប ណែម, លោក ឈួន ឆៃ , លោក ឯម សូណា , លោក ឳ ផូ....។
ពាណិជ្ជករភាពយន្តថៃ បានរៀបចំពិធីសម្ពោធបញ្ចាំងជាផ្លូវការ ដោយអញ្ជើញតារាភាពយន្តខ្មែរបីដួង មកចូលរួមជាកិត្តិយសរួមមាន តារា គីម ណូវ៉ា , តារា ណុប ណែម និងលោក សម សុផុន តែជាអកុសលមុនចេញដំណើរមកក្រុងបាងកក ៣ថ្ងៃ លោក ណុប ណែម ត្រូវពួកយៀកកុងចាប់ខ្លួននៅត្រាំខ្នារ ពេលលោកចេញពីថតភាពយន្តនៅទីនោះ បណ្តាលអោយពិធីនេះត្រូវផ្អាកទាំងស្រុង តែភាពយន្តនេះដាក់បញ្ចាំងតាមការគ្រោងទុកដដែរ។
20 июн 2024