#កុយសារឹម #ក្រុមដំណេីរខ្មែរ
ក្នុងចំនោមអ្នកចម្រៀងជាច្រើនក្នុងសម័យយុគមាស មានអ្នកចម្រៀងតិចតួចណាស់ដែលមានសំណាងបានរួចផុតពីការសម្លាប់របស់បនក្បត់ប្រល័យសាសន៍ឯងប៉ុលពត ក្នុងនោះមានអ្នកចម្រៀងស្រ្តី កុយ សារឹម ម្ចាស់បទ ចាំមើលផ្លូវបង ក្នុងសម័យសង្គមរាស្រ្តនិយម។
អ្នកចម្រៀង កុយ សារឹម ប្រឡូកក្នុងវិស័យសិល្បៈតាំងពីពាក់កណ្តាលទសវត្ស៦០ ក្រោមការណែនាំរបស់លោក ពៅ ស៊ីផូ និងលោក អ៊ូម អួន។ ទឹកដមសំនៀងដ៏ស្រទន់ស្រួយស្រេះរបស់អ្នកចម្រៀងរូបនេះមានលក្ខណៈប្រហាក់ប្រហែលនឹងតារាចម្រៀងហួយ មាស និងកែវ សុខា។
ក្រៅពីច្រៀងចម្រៀងផ្សាយតាមវិទ្យុជាតិ តាមរយះចម្រៀងស្នាដៃនិពន្ធរបស់លោក ពៅ ស៊ីផូ និងអ្នកនិពន្ធដទៃទៀតនោះ សម្លេងរបស់អ្នកចម្រៀង កុយ សារឹម មានភ័ព្វបានចេញផ្សាយលក់ក្នុងថាសចម្រៀងជូនក្រុមហ៊ុនថាស អប្សរា។
ក្រោយពីរស់រងទុក្ខវេទនាក្នុងរបបប្រល័យពូជសាសន៍ខ្មែរក្រហម នាទឹកដីខេត្តបាត់ដំបង លោកស្រី កុយ សារឹមបានភៀសខ្លួនចេញទៅរស់នៅជំរុំសាយធូ ហើយបានចូលរួមជាអ្នកចម្រៀងក្នុងតន្រ្តីបន្ទាយអំពិល ជាមួយលោកសាស្រ្តាចារ្យអ៊ំ ដរ៉ា ។ នៅក្នុងពេលនោះ លោកស្រីក៏បានចូលរួមច្រៀងថតផ្សាយក្នុងចលនាតស៊ូរណសិរ្សខ្មែររំដោះជាតិរបស់លោកសឺន សាន។ នៅដេីមទសវត្ស៩០ លោកស្រីក៏បានថតចម្រៀងជូនផលិតកម្មផ្កាយរះ បាន៣វ៉ុល។
រៀបរៀងដោយ វីរៈ វ៉ារ៉ានី
ស្រាវជ្រាវដោយ ក្រុមដំណើរខ្មែរ
ថ្ងៃទី១០ ខែកក្កដា ឆ្នាំ២០២៤
11 июл 2024
