សាស្រ្តាស្លឹករឹតខ្មែរ - អនាគតដ៏ស្រពេចស្រពិល 

៙នេះជាភាពយន្តឯកសារខ្នាតខ្លីស្ដីពី "សាស្រ្តាស្លឹករឹតខ្មែរ -​ អនាគតដ៏ស្រពេចស្រពិល" ដែលក្រុមការងារទាយាទអង្គរយើងបានចុះទៅថត និង សម្ភាសផ្ទាល់ជាមួយនឹងអ្នកដែលនៅបន្តចារសាស្រ្តាស្លឹករឹតខ្មែរនៅឯខេត្តសៀមរាបមាន៖ គ្រួសារបងភឿន ផាវី នៅឯស្រុកពួក និង លោកតាម៉ក សារ៉ម ជាអាចារ្យរងវត្តអធ្វារ ក្នុងសង្កាត់ស្ពានជ្រាវ ក្រុមសៀមរាប។ លើសពីនេះទៀត នៅក្នុងភាពយន្តនេះដែរ ក្រុមការងារយើងក៏បានសម្ភាសលោកឡេង កុកអាន ប្រធានអង្គការសិក្សា ស្រាវជ្រាវ និង អភិរក្សសាស្រ្តាស្លឹករឹតខ្មែរ នៅឯវត្តឧណ្ណាលោម ដើម្បីធ្វើឲ្យភាពយន្តនេះកាន់តែមានលក្ខណៈស៊ីជម្រៅអំពីសាស្រ្តាស្លឹករឹត ការអភិរក្ស និង ហានិភ័យនានាដែលវាកំពុងប្រឈមមុខយ៉ាងខ្លាំងនាពេលបច្ចុប្បន្ន។ ជារួម គោលបំណងនៃភាពយន្តនេះគឺ៖ "ចង់ឲ្យប្រជាជនខ្មែរគ្រប់រូបបានស្គាល់អំពីគុណតម្លៃ ការបាត់បង់ ការអភិរក្ស និង បំណងប្រាថ្នាចុងក្រោយរបស់អ្នកដែលបានខិតខំធ្វើឲ្យសាស្រ្តាស្លឹករឹតខ្មែរនៅតែមានដង្ហើមបន្តនៅក្នុងសង្គមជាតិយើង"។
ជាចុងក្រោយ ក្រុមទាយាទអង្គរ _ ព្រឹត្តិការណ៍ "លក្ខណៈពិសិដ្ឋនៃអក្សរសាស្ត្រ និង សាស្រ្តាស្លឹករឹតខ្មែរ" ១៦ តុលា ២០១៦ CKCC _ ពិតជាប្រាថ្នាចង់ឃើញប្រជាជនខ្មែរគ្រប់រូបចូលរួមគ្រប់សកម្មភាពអភិរក្ស និង អភិវឌ្ឍន៍សាស្រ្តាស្លឹករឹតខ្មែរសម្រាប់អ្នកជំនាន់ក្រោយរបស់យើងទាំងឡាយ ត ទៅ៚