“Hech qachon bajarayotgan ishimdan afsuslanmaganman” - poyabzal ta'mirlovchi usta hikoyasi
Hunar o‘rganish insondan e'tibor, qunt talab qiladi. Tanlagan kasbiga nisbatan qiziqishi yuqori bo‘lsa, o‘rganish ham oson kechadi. Kishi ishini muhabbat bilan qilishi gap so‘zidan yaqqol seziladi. Poyabzal ustasi Feruzbek Bo‘riev ham kasbini sevadiganlardan. Hunari ketidan halol daromad ko‘rayotgan usta, ishini boshqasiga almashtirishni o‘ylab ham ko‘rmagan. U Toshkent shahar Yunusobod dehqon bozorida ishlaydi. Bir kunda uning qo‘lida qanchadan-qancha poyabzal “qayta jonlanadi”.
Odamlarning duosi tufayli ishimda baraka bor
1993 yil Samarqand viloyati, Kattaqo‘rg‘on tumanida tug‘ilganman. Poytaxtga kelishimga opam va akam sababchi, ular Toshkentda o‘qishgan. O‘zim ham oliygohga hujjat topshirib ko‘rdim, biroq kirolmadim. Shundan so‘ng poyabzal ustasi bo‘lishga qaror qildim. Kasb sirlarini pochcham o‘rgatgan. Hunarimni juda yaxshi ko‘raman. Bu ishdan non topib yeyayotganimga o‘n yil bo‘ldi. O‘tgan vaqt davomida hech qachon bajarayotgan ishimdan afsuslanmaganman. Chunki, men halol mehnat orqali pul topyapman. Shukur, oilamni boqishda, hech qanday kamchiliklar sezilmaydi. Odamlarga yordam berib, ularning duosini olaman. Kasbni sevib qolish uchun shuning o‘zi yetarli. Ertalab ishga kelaman, kechga yana xotirjam holda uyimga qaytaman. Insonning bajarayotgan ishida minnatdorlik tuyg‘usi bo‘lsa, uning ishida ham unum ham baraka bo‘ladi.
Foyda xarajatni qoplaydi
Ishimiz ertalab soat to‘qqizda boshlanib, kechgi payt olti- yettigacha cho‘ziladi. Daromadim kunlik ishga bog‘liq. Agar, mijozlar ko‘p bo‘lsa, harajatlardan tashqari ellik - oltmish ming so‘m topaman. Bitta oyoq kiyimni tuzatish uchun ketadigan xarajat poyabzalning holatiga bog‘liq. Misol uchun, poyabzalning tagi umuman yo‘q, yaroqsiz bo‘lgan vaziyatda uning hamma joyini qaytadan ta'mirlashga to‘g‘ri keladi. Bunday holatlarda unga homashyo ham ko‘p ketadi. Shunga qarab mijoz to‘laydigan pul ham qimmatroq bo‘ladi. Yigirma besh - o‘ttiz ming so‘m xarajat qilsak, undan o‘n - o‘n besh ming so‘m o‘zimizga qoladi.
Kelgusida poyabzal ishlab chiqarishni yo‘lga qo‘ymoqchiman
Bu ishga kelishimdan oldin ikki yil shogird tushdim. Ustozimning bajarayotgan harakatlariga yaxshilab e'tibor berardim. Vaqt o‘tkazish uchun yoki faqat kelib- ketish uchun yurmaganman. Ertaga boshqa qiyinroq yumushni qiladigan bo‘lsam, mijozning oldida qizarib qolmasligim kerak derdim. Hamisha odamlarning ishonchini oqlashga e'tibor qilaman. Inson hech qachon bir hunarni o‘rganganidan so‘ng to‘xtab qolishi kerak emas. Kelajakdagi rejalarimdan biri - o‘zim poyabzal ishlab chiqaradigan sex ochmoqchiman. Keyingi yillarda bu ishni amalga oshirishga jiddiy harakatni boshlayman. Hozircha, sex qurish uchun qulay joylarni surishtirib yuribman. Xudo xohlasa, ko‘nglimga mos joyni topsam ishga kirishaman.
Muomala ko‘p narsani hal qiladi
Muomala ishimizda birinchi o‘rinda turadi. Odamlar bilan samimiy, halol bo‘lsangiz, ular doimiy mijozingiz bo‘lib qolishadi. Yana qiladigan ishingizda sifat bo‘lsa, har qanday kishining ko‘nglini topish mumkin. Ishingizdan ko‘ngli to‘lgan bitta odam, ketidan o‘nta kishini yetaklab keladi. Ko‘rib turganingizdek, bu yerda poyabzal ta'mirlaydiganlar ko‘p. Ular o‘rtasida jiddiy raqobat mavjud emas. Ish davomida bekor qolib ketgan vaqtlarim juda kam bo‘ladi.
Hunarli odam xor bo‘lmas.
Men hunar egallamoqchi bo‘lgan yoshlarga ishni yaxshi ko‘rishi va e'tiborliroq bo‘lishlarini maslahat bergan bo‘lardim. Shogird tushganda ustozidan kasbning sir asrorlarini chuqur o‘rganish kerak. Qilinayotgan yumushlarning ketma-ketligini diqqat bilan kuzatishi lozim. Kuniim o‘tsa bo‘ldi deydigan inson inson har qanday hunarni o‘n - o‘n besh yilda ham o‘rganolmaydi. Yoshlar esa bitta hunarni qunt bilan egallashlarini aytgan bo‘lardim. Hunar o‘rgangan inson hech qachon kam bo‘lmaydi, muhtojlik sezmaydi. O‘zi qiziqqan, o‘ziga yoqqan kasb bilan shug‘ullangan odamning hayoti mazmunli o‘tadi deb o‘ylayman.
Jamshidbek Amirov tayyorladi.
13 июл 2021
