Qadimiy va hamisha navqiron Samarqand shahrining zamonaviy xalqaro aeroportida “Uzbekistan Airports” yoshlari “Bir maqsad uchun birlashaylik” shiori ostida rahbar va yoshlar uchrashuvi bo‘lib o‘tdi.
Unda, yosh mutaxassislar aviatsiya sohasida kasbiy malaka, bilim va ko‘nikmalarini yanada rivojlantirish imkoniyatiga ega bo‘ldilar.
“Uzbekistan Airports” AJ tarkibiy tuzilmalaridan tashrif buyurgan 100dan ortiq yosh mutaxassislar ikki kunlik tadbirda: aeroport faoliyatini rivojlantirishda yangi g‘oyalar va tashabbuslar, hamkorlik masalalari, kompaniya rahbariyati bilan interaktiv muloqot hamda aviatsiya mavzusiga oid intellektual jamoaviy musobaqalar bilan birga, yoshlarning loyihalari ham muhokama qilindi.
“Bu biz uchun haqiqiy yutuq bo‘ldi”, - deydi Buxoro xalqaro aeroporti Xavfsizlik xizmati smenasining katta xodimi Erkin Xolov. - Ushbu uchrashuv va ochiq muloqot, ayniqsa Boshqaruv raisi ishtirokida, o‘zgacha ruhda o‘tdi. Ishonchim komilki, nafaqat men uchun, balki hamkasblarim uchun ham. Biz go‘yoki o‘zgacha energiya olganga o‘xshaymiz. Biz ilhomlandik va eng muhimi, bir maqsad sari jamlandik! Shuningdek, o‘z fikrlarimiz, takliflarimiz va loyihalarimiz bilan bo‘lishish imkoniyatiga ega bo‘ldik.
Yosh mutaxassislarning takliflari va g‘oyalari haqida gapirganda, shu kunlarda kompaniyada yoshlar tashabbusi bilan ko‘plab yangiliklar va loyihalar amalga oshirilayotganligini alohida taʼkidlash lozim.
“Bugungi kunda yoshlar tashabbuslari tufayli kompaniyadagi bo‘sh ish o‘rinlariga ishga qabul qilish loyihasi takomillashtirilmoqda, aviatsiya sohasidagi iqtidorli talabalar uchun stipendiya joriy etildi, Boshqaruv raisining yoshlar masalalari bo‘yicha maslahatchisi tashabbusi bilan yoshlar siyosati murojaatlari va muhokamalari portali tashkil etildi”, - dedi Ijtimoiy siyosat bo‘limi boshlig‘i Alisher Narmatov.
- Uchrashuvda, shuningdek, amalga oshirilishi rejalashtirilayotgan takliflar ham tinglandi”.
7 сен 2024