《區區有女神》王敏奕V式西多 氹得上環西裝男嘴舔舔
影壇新貴王敏奕自小與母親在上環生活，她在今集東網巨星節目《區區有女神》中帶大家重遊此區重拾回憶，Venus喜歡到上環文娛中心睇舞台劇增進演技，亦經常陪媽咪到上環街市買餸，行到熟食市場一層， Venus忍不住殺入廚房露兩手，親自整西多士冧客，夠晒貼地又Sweet ！
試食畀滿分
Venus獲網友封為「氣質女神」，除了樣靚又夠仙氣，原來廚藝亦不俗，難怪深得網友喜愛！ Venus炮製西多士相當熟手，毋須驚動老闆娘教路，已經做好打蛋、開鑊、煎包，最後以一招菜刀切西多，再加上煉奶，色香味俱全的「V式西多」順利完成！「Chef Venus」笑言平日都是自己整早餐，難怪全程邊煮邊笑輕鬆自若，甚有潛質效法「Chef Nic」謝霆鋒搞個煮食節目！
要知係咪睇得唔食得？當然要搵食客試吓Venus手勢，靚女食客食到舔舔脷，5分滿分畀4分，笑言要留一點進步空間給Venus，Venus即大笑： 「佢將來會係個好媽媽！會激勵個女繼續進步。」另一位西裝男Barry則畀足5分滿分，Barry更自爆有留意Venus的影視作品，氹得Venus笑逐顏開！
多士奶茶絕配
Venus直言這個街市充滿她與母親的開心回憶，因此重遊此地分外懷念：「細個嗰陣媽咪好忙，佢一放工就會帶我哋揀間檔口食嘢，咁多檔食勻晒㗎喇！而呢間最有港式懷舊感覺，我鍾意嚟食多士飲奶茶，同媽咪一路傾偈一路食嘢，好開心！」
4 окт 2024
