@boxchannel7957 《月傾會》又嚟喇！主持林柏希今次請到伍詠薇做嘉賓！啱晒timing，今晚亦係《金宵大廈2》最新單元《雙魚》嘅播出！伍姑娘喺劇中飾演一個神經質阿媽芬姐，仲為咗角色刻意減磅，成個人又凹又乾，超級專業，「《金宵大廈》第一輯，我真係唔係big fan，我冇睇晒，不過我知道口碑好受歡迎！我可以參加其中，對我嚟講係少少cult cult地嘅片，幾得意，對一個演員嚟講，兩集要完成一個故事，如果寫得唔好，係好大鑊㗎！」
問到佢有冇介意要演蘇皓兒阿媽，一貫真性情嘅伍姑娘就話：「黐線㗎！我之前做過黃宗澤阿媽啦！」今次為角色更加刻意減磅，「本身我都唔係肥底嘅人啦，我係特登跌磅跌到去47 kg然之後再dehydrate，拍緊嘅時候唔飲水、唔食嘢再dehydrate，乾住唔上妝！」超級專業呀！
去到重頭環節《大膽答 冇膽食》，今次預備咗伍姑娘最怕嘅食物-榴槤！林柏希首先問入行33年嘅伍姑娘，遇過令佢發晒脾氣嘅對手係邊個？竟然有兩個喎，伍姑娘雖然冇開名，不過就大爆：「兩個字！男人！兩個！失蹤唔到、嗰個飲醉！」男星A玩失蹤、男星B就入廠拍劇拎住汽水罐，原來入面係酒，「因為我同呢個人真係好多戲，（成浸酒除？）唔，真係汽水味囉，一身的酒氣，何以我會認得你！」問佢係咪亞視年代嘅？伍姑娘話：「我仲去得邊度呀？」佢仲俾咗四個字提示：「芳華絕代」！呢四個字，大家估唔估到係邊兩位男星呢？
跟住問伍姑娘，最曳做過邊一件事？「最曳嗰件事咪讀中學嗰時，被迫踢入三合會囉，跟住咪1個打14個，我勁過甄子丹！」感情上面最曳呢？「溝人哋老公囉！」溝咗幾多個有婦之夫？「計唔到，計到，五個以內啦！」大膽答，不過伍姑娘都捱義氣食咗啖榴槤！
回顧入行歷史，伍姑娘出身1989年亞姐，當年冠軍翁虹、亞軍萬綺雯、季軍趙靜儀，頂頭大熱嘅伍姑娘只獲「最上鏡小姐」。問佢當年最唔妥邊個？「又係兩個字呀！翁虹其實係炒作到我同佢唔啱咋嘛！冇乜特別憎，當時可能憎幾嘢咁囉，即係可能覺得你咁樣撥下啲頭髮，作狀，作狀到佢；萬綺雯『耶』一聲咁樣，作狀，即係呢啲囉！」
講到佢2013年曾經離開TVB，當時報道有指伍姑娘曾被女高層羞辱！林柏希叫佢還原實況，伍姑娘話：「當日就喺一個conference room，約咗我開會，再傾下個角色！」女高層上身：「其實講晒㗎喇，你知唔知呀，林柏希（假設男主角）做主角，林柏希都未知個劇情係點樣呀，你伍詠薇已經知道咗好多㗎喇已經！」
伍姑娘回憶：「跟住鬧到我呢，我開始唔反駁喇，因為見到你咁燥底，我識咗你咁多年，你咁燥底，我咪開始就唔反駁啦，我話，唔係，我都係想嚟問一問呢個角色啫，佢就執住咗一樣嘢，話你要咁多戲做咩啫，得呀，我寫好多場俾你都得，你咪棟喺度，即係something like佢冇話丫鬟，未必係呢兩個字！」繼續女高層上身，「林柏希都未必鍾意你做㗎！」伍姑娘話：「我嗰下真係着啦！我真係走，我話唔該晒，咁我考慮一下，佢話，咁咪好啦，你唔做嘅話呢，我哋搵第二個做呢個角色！」伍姑娘仲話，一年之後，另一個女高高層才搵返佢了解詳情，「一年之後，有一位高層問我，到底嗰日發生咩事，點解你唔作出解釋！」
講完拍劇秘聞，輪到傾下婚姻生活，林柏希直接問：「依家嘅性生活愉唔愉快？定係dry咗好耐？」真性情伍姑娘話：「性生活少咗好多，因為對咗同一個樣二十年，你試下對一個女人二十年，靚到李嘉欣咁樣呀，都要搵阿伍詠薇啦！」幾耐一次？「唔定㗎喎，咁八年都有一次嘅！你問我問題，你理得我點答你啫！」認真抵死！
講到老公練海棠，曾被拍得妙齡少女出街，當年伍姑娘選擇原諒。佢話：「我個人自己食嘢都……我係唯靈嚟嘅，食家，哈哈哈！我係冇嬲，我反而第一係諗下自己，呢件事發生一定有原因，自己有咩問題，有冇問題，有問題，咁佢更加有問題啦，所以你嘅問題大啲，我嘅問題都有我嘅問題存在，大家商討囉，傾得埋就合，傾唔埋就分手！」
最後伍姑娘仲大爆想同姜濤談情母子戀，仲對亡夫翁江培有一番深情告白！即刻去片睇足本啦！
訂閱盒子YT頻道同步睇片：bit.ly/3vi0kPx
#盒子 #boxchannel #月傾會 #伍詠薇 #金宵大廈2 #雙魚 #單元 #爆料 #男明星 #女高層 #婚姻 #姜濤 #母子戀
-----------------------
記得follow晒呀
FB：bit.ly/2WlzyYF
YT：bit.ly/3guXGz0
IG：bit.ly/3n0YIHg
8 окт 2024
