第一樣要忠告大家,睇《談判專家》前,千祈唔好去睇返《冇數講》,因為無睇原作,睇翻拍版會覺得電影娛樂性十足,橋段好有新鮮感甚至覺得好精彩添,但係睇過原作就會覺得個改編與其話改,真係似係只改咗做廣東話咁咋,太多劇情無改照搬,係會有失望嘅。
其實《暗戰》一早就有講談判專家,有邊個唔記得劉青雲飾演嘅何尚生督察,就係被劉德華選中,要靠佢去完成一場暗中進行嘅珠寶劫案以及復仇行動!1999年作品,當時就被指有1998年出嘅荷里活電影《冇數講》(The Negotiator)嘅影子!
今次邱禮濤決定直接翻拍《冇數講》成為《談判專家》,不過話就話翻拍,但係都有唔少改動,首先吳鎮宇個角色改動最大,將佢由談判專家變成社工,呢個其實都幾睇到邱禮濤近年電影作品想要有嘢講嘅作風。
其實多年嚟邱禮濤都不斷用電影去加入自己對香港社會嘅睇法,尤其係自從2017年嘅《拆彈專家》第一集開始,我就覺得邱禮濤啲電影嘅動作大場面,嗰啲所謂嘅大龍鳳,又或者係成套戲嘅中心思想,其實係有佢想講嘅嘢喺入面!
28 авг 2024