《RubberBand Ciao》演唱會「尾場」2021年4月6號（星期二）復活節翌日公眾假期尾 

原諒我將《睜開眼》錄底咗（5分21秒）因為我好想錄低呢個「見證」雖然知道呢首歌大約會點玩，但效果出現時，仍然係會令人驚嘆，亦都會令大家即時入局，即時好多唔同念頭喺腦入面湧出嚟，一方面聽住一首好真摯澎湃嘅作品，另一方面個心又再次有好多鬱結以及好多你明知唔可能但忍唔住出現嘅盼望。或者，會睜開眼嘅人，其實真係已經全部睜開眼，而呢一班人，亦為著無能為力以及深深不忿而流下眼淚。