翁靜晶喺1984年與黃飛鴻嘅第四代弟子劉家良結婚，兩人年齡相差30年，當年冇人睇好呢段忘年戀。翁靜晶曾經講過：「自己前世係一隻金絲雀，被劉家良飼養，今世嫁畀佢嚟報恩。」
對於呢一段往事，翁靜晶笑著說：「呢個係劉師傅個阿媽講嘅，可信性未必咁高。佢話你都唔知點解會鍾意佢，除非你就係嗰隻雀仔變嘅。因為劉師傅細個有隻了哥，行出街撞死咗好傷心，佢阿媽講嚟笑我哋，講講吓變咗真咁樣，可能大家都唔理解點解我咁意佢囉。」
1984年，翁靜晶毅然嫁劉家良，並育有兩名女兒，彼此情繫差不多30年，直至劉師傅於2013年病逝。翁靜晶自小在單親家庭長大，缺乏父母嘅愛，佢拭著淚話：「係劉師傅畀咗家嘅感覺我。」翁靜晶承認劉師傅給予佢最大包容，除咗俠義精神，仲教曉佢面對生老病死嘅豁達，佢話：「佢打咗兩、三支針化療，有次佢同我哋講洗頭時甩好多頭髮，嚇到洗頭嗰個人手騰腳震。我哋喺啲唔應該笑嘅地方度笑咗，但佢抗癌過程嗰種豁達，令我學咗好多，因為好多時呢啲英雄人物面對生死嘅時候，未必可以咁輕鬆。」
劉師傅唔係一個好浪漫嘅人，買條魚加餸，或者買匹布畀你做衫就係浪漫。翁靜晶從來未收過劉師傅送嘅花，佢解釋﹕「如果你要買花，佢會買棵樹畀你，所以我出面(庭園)棵芒果樹就咁嚟，有盆有根要生果。」泥土下撒有劉師傅部份骨灰作紀念，問到可信有下一世？翁靜晶想一想回答：「唔想呀，唔好再番嚟就最好，但如果再返嚟，就唔係見劉師傅，我返嚟係要肅清啲敗類。」
2 дек 2017
