中聲3海選第二日丨FC堂姐參賽成焦點 82歲最年長參加者現身 

中聲3海選第二日丨FC堂姐參賽成焦點 82歲最年長參加者現身
《中年好聲音3》參加人數眾多，今年香港賽區已有約4200人報名參加，一眾參加者分批嚟到電視城進行海選，21號係海選嘅第二日，依然吸引大批唱得嘅素人參加。首位面試嘅就係現年82歲嘅賴群玉，賴女士撐住拐杖入內見評審，佢可以話破參加者最年長紀錄，一心諗住挑戰自己嘅賴女士自爆唔聽女兒勸告，由傭人姐姐陪同嚟面試，可以話係勇氣可嘉，佢因為唔識搞音樂，所以實行清唱上陣，搏得全場掌聲。
中聲2嘅人氣王譚輝智一早透露會有家人參賽，呢日亦終於揭盅，譚輝智嘅堂姐譚旨經現身面試，而輝智刻意未有監場以免堂姐太大壓力，雖然堂姐發揮未係最好，但輝智大賣口乖指堂姐當年唱功已達專業歌手水平，希望堂姐加油。
云云參加者中有兩位令一向嚴格嘅伍仲衡忘記撳叮叮，分別係以生鬼演繹《唐山大兄》嘅尤志豪以及動人演繹《給兒子的信》嘅嚴志恒。 演員身份嘅尤志豪更自爆黑歷史，2020年曾上載翻唱歌《小黑與我》被網民一致評定係樂壇已死，希望參加節目為自己平反。尤志豪嘅演繹娛樂性十足更被伍Sir爆出一句評語:「樂壇需要你！」
另一位55歲嘅嚴志恒獻唱一曲《給兒子的信》送畀自己就快畢業嘅女兒，鼓勵對方笑住面對人生高低同關卡，因為聲線獨特加上真情演繹，令在場嘅總經理聽到眼濕濕不時抹淚。而參加者阿Ben亦分享自己患有末期腎衰竭嘅經歷，希望鼓勵病友可以活出積極人生。
作為評審嘅肥媽對於第二日海選嘅參加者相當滿意，仲好高興見到唔同嘅選歌類型，有人唱歌劇，有人唱粵劇，其中一種風格更甚得肥媽歡心，肥媽更要求參加者唱多次。
#中年好聲音3 #中聲3 #4200人 #海選第二日 #譚輝智 #譚輝智堂姐 #譚旨經 #最年長參加者 #賴群玉 #尤志豪 #伍仲衡 #肥媽 #嚴志恒 #Ben #海兒 #末期腎衰竭 #生命鬥士 #中年好聲音 #總經理 #粵劇 #TVB #娛樂新聞 #TVB娛樂新聞台 #ENews #HKENews #香港娛樂八卦新聞 #八卦新聞
即刻Follow TVB 娛樂新聞台 Facebook專頁
/ tvbenews
登入myTV SUPER享受睇TVB自製節目7日包括娛樂新聞的免費點播
bit.ly/2TXLlM0