24 May 2022 at 12:13:14 am 香港馬王「金鎗六十」早前放棄遠征安田紀念賽，馬會新聞稿及SCMP報導就話練馬師同馬主商量後，基於健康原因決定放棄部署出戰。而另外有其他媒體就引述馬主指「去了也不會夠跑，不如省點氣力」，並指湘南錦標冠軍「俊彥茶座」（Justin Cafe，ジャスティンカフェ）表現令人驚豔，令馬主卻步。唔知以下呢個消息，馬主睇完會點諗呢？ 安田紀念賽報名馬琴日出爐，合共有21匹賽駒，當中包括「俊彥茶座」。由於出賽權會優先比預賽贏馬嘅賽駒，即讀賣一哩盃及京王盃春季盃。由於京王盃春季盃冠軍「齊叫好」（Meikei Yell，メイケイエール）棄戰，只得讀賣一哩盃冠軍Soul Rush（ソウルラッシュ）可獲優先出賽權，另外20匹馬會依獎金排序，頭18位可獲出賽席位。 「俊彥茶座」為三勝Class頭馬，獎金較其他參賽馬低。佢排喺第20位，即至少要兩匹馬退出先可以出戰。由排喺佢前面嘅退出機會理應不大，因此「俊彥茶座」跑到今年安田紀念賽機會極低。若然馬主真係因為怕「金鎗六十」唔夠「俊彥茶座」跑嘅話，而家對方連出都出唔到，唔知佢又會覺得點呢？
