擺上枱：黃背心=真記者？【主持人：屈穎妍】 

簡單啲講，記者嘅工作就係接觸事實、將真相話俾大眾知。以前記者係喺新聞機構做嘢、受過專業教育同訓練嘅人，而家網絡、電子科技發達咗，就好似人人皆記者，任何人隨時隨地影輯相、拍條片、寫幾隻字po上網，就可以變出條「新聞」即時傳播。就咁睇，做記者似乎好易，但唔好忘記，做記者必須具備識分是非黑白、做客觀公正報道嘅基本質素。
睇返近排幾場衝突，某啲所謂「記者」，喺現場嘅表現就真係叫人O晒嘴！著住件印咗「記者」、「PRESS」嘅黃背心，「勇」字當頭，夾喺警察與暴徒中間，「一唔小心」就企去暴徒陣營前，阻住警察視線，俾暴徒順利逃脫。係咩記者，採採吓會join埋啲暴徒、為暴徒護航呢？好想問佢哋噏唔噏得出受聘於邊間新聞機構呢？
記者身上嘅黃背心，係「無冕之王」嘅身份象徵，賦予記者唔受侵犯嘅採訪權力、喺暴亂中嘅護身符，但若著住黃背心嘅人，冇新聞使命感、冇正確嘅是非觀、甚至冇做人基本嘅良知，後果會點呢？今集屈穎妍擺件黃背心上枱，與大家分享睇法。