星光路上丨劉穎鏇入行七年終奪目標 成為觀眾票選飛躍進步女藝員獎 

星光路上丨劉穎鏇入行七年終奪目標 成為觀眾票選飛躍進步女藝員獎
劉穎鏇 作客《星光路上》接受主播 潘盈慧 訪問，Tiffany喺《2016年度香港小姐競選》奪得亞軍暨最上鏡小姐之後，正式展開演藝事業，喺幕前參與綜藝同劇集演出，成績有目共睹，經過連續四年提名「飛躍進步女藝員」後，喺今年初舉行嘅《萬千星輝頒獎典禮2023》，「飛躍進步女藝員」獎座終於成為囊中物。
入行七年，Tiffany話時間過得好快，佢解釋點解上台會激動到喊，因為佢事前無諗過自己會得到，加上呢個獎喺佢眼中係代表得到觀眾認同佢有進步，所以係佢一路以嚟最渴望得到嘅嘢。
得獎時，Tiffany答謝父母，佢話好感激父母一直畀佢自由，明白佢有自己嘅目標想追求同達成，所以就好放心畀佢去嘗試，只要係開心就得。佢話同父母都好少開口表達感受，所以得獎得都無特別講啲乜，只係媽咪讚佢叻女。
Tiffany記得啱啱選完港姐，當時自己廣東話唔好，又完全唔識睇中文字，再加上本身有少少怕醜。但係覺得自己好幸運，因為入行初期就加入咗《學是學非》，透過綜藝節目同埋一班《學是學非》嘅女仔，仲有台前幕後融洽相處，令佢克服咗對住鏡頭緊張同恐懼感覺。
Tiffany承認最初中文唔好嘅時候，存在好多不安全感，佢話當年啱啱讀完大學第一年，由一個好奇心出發，就覺得去參選都幾得意，於是就同父母講想去遞表參選，Tiffany話其實當初媽咪完全唔相信佢會咁做，不過佢就突然有鼓勇氣交咗報名表格。
佢仲記得當日係佢同班朋友打籃球時，突然收到一個長途電話通知佢入咗第二輪面試，最終佢就飛咗去溫哥華面試。Tiffany話第一輪面試時，係Daddy車佢去，點知佢突然喺途中好似回到現實話都係唔想去，跟住Daddy同佢講我哋咁遠嚟到呢度，妳唔好同我講妳唔去呀，最終佢掙扎咗好耐決定去試吓。
正式展開演藝事業，接到好多動作戲份，做打女嘅機會，Tiffany都話完全估唔到，講到第一套參演嘅劇集《兄弟》，劇中飾演一位拳手，事前都有上堂學打拳，之後就不停練習，佢都講笑話差啲以為自己真係要做拳手。之後另一套劇集《超能使者》亦令Tiffany感到壓力，佢話從來未演過一個角色同自己性格咁相反，染咗個粉紅色頭髮、粉紅色眼影、紅色唇膏，除咗造型，連性格都唔似自己，而呢個角色亦令佢踏上咗安全區，夠膽去試更多嘅嘢。
喺舊年播出嘅《隱形戰隊》更加係挑戰Tiffany嘅底線，佢除咗事前花咗好多時間去訓練，每星期至少有五、六日時間去健身室操練，嗰段時間差不多係佢最大隻嘅階段。雖然如此，Tiffany仍然覺得有不足之處，講到身形，佢認為可以更加弗同更加多肌肉，因為事後睇片都覺得好似仲有啲腫。
奪得「飛躍進步女藝員」，問到Tiffany下一個目標，佢唔敢講向住咩獎項進發，佢解釋一向唔敢將獎項成為目標，因為只係想將自己做到最好，咁先可以推動到自己更多，所以只係想自己越嚟越進步，演技上得到更加多人認同，可以有更多突破，希望會有更多唔同嘅角色、唔同嘅劇本，畀到佢嘗試唔同嘅嘢，令觀眾睇到更多一面嘅佢。
#星光路上 #劉穎鏇 #萬千星輝頒獎典禮2023 #飛躍進步女藝員 #2016年度香港小姐競選亞軍暨最上鏡小姐 #學是學非 #兄弟 #超能使者 #隱形戰隊
#TVB #娛樂新聞 #TVB娛樂新聞台
#ENews #HKENews #香港娛樂八卦新聞 #八卦新聞
即刻Follow TVB 娛樂新聞台 Facebook專頁
/ tvbenews
登入myTV SUPER享受睇TVB自製節目7日包括娛樂新聞的免費點播
bit.ly/2TXLlM0