獨家場內直擊｜李琳琳姜大衞慶金婚 好友設宴賀成眷半世紀
喺5月20號「520」呢個咁浪漫嘅日子， 李琳琳 同 姜大衞 獲一班家人好友相約晚宴，筵開六席慶祝50周年金婚，兼補祝John哥首奪香港電影金像獎嘅「最佳男配角」。
一對主角徇眾要求下一而再親吻慶祝，為晚宴牽起高潮，琳琳姐話多謝連炎輝同一眾好友悉心安排，感激大家對佢哋夫婦嘅疼錫，帶嚟難忘嘅一晚。琳琳姐話眨吓眼就50年，John哥話金婚真係唔容易，希望仲有多50年。夫妻相處之道，就係互相遷就禮讓，而琳琳姐就大讚老公比以前進步，浪漫咗好多。
到嚟祝賀賓客包括曾志偉、羅蘭、盧海鵬、賈思樂、廖安麗、吳麗珠、余安安、鄧達智、馬海倫、何麗全、甄楚倩、陳友同黃允財等70多人，唔少賓客仲人到禮又到，志偉就大讚John哥同琳琳姐係演藝界模範夫婦，賈思樂就話好多夫婦只係5年已經分開，所以50年非常值得慶祝，羅蘭姐大讚佢哋夫婦不論任何地方都好恩愛。
除咗好友到賀，琳琳姐嘅大女姜依蘭、女婿曹永廉、細仔姜卓文同女友亦有到場，但係原來一對仔女為咗畀父母驚喜，竟然講咗美麗謊言，依蘭話一對仔女要考試所以唔到，琳琳姐就踢爆老公為此好嬲，從未見過老公咁小氣，John哥就解釋：「50年一生人得一次，考試就年年都要考。」
而姜卓文就話一直扮唔知有晚宴，當爹哋問佢嚟唔嚟嘅時候，佢仲講大話要去試鏡，阿廉都話好彩趕得切返香港，因為之前喺柬埔寨拍嘢。
#金婚 #李琳琳 #姜大衞 #最佳男配角 #夫妻相處之道 #互相遷就禮讓 #曾志偉 #羅蘭 #盧海鵬 #賈思樂 #姜依蘭 #曹永廉 #姜卓文 #美麗謊言 #踢爆 #小氣
#TVB #娛樂新聞 #TVB娛樂新聞台
#ENews #HKENews #香港娛樂八卦新聞 #八卦新聞
即刻Follow TVB 娛樂新聞台 Facebook專頁
/ tvbenews
登入myTV SUPER享受睇TVB自製節目7日包括娛樂新聞的免費點播
bit.ly/2TXLlM0
26 сен 2024
