今日工務小組委員會其中一個議程係講古洞北起新街市，我就問咗政府有關街市營運模式嘅問題。
我喺2018年同時任食環署長傾過一樣嘅問題，當時我已經話佢哋經營街市嘅思維根本係超錯！政府係想用平租俾一班人得閒返吓工求求其做；定係提供市民追住買嘅服務同產品先？唔係又會送晒啲客俾領展。咁多年嚟政府一直都冇答呢個問題。
以我嘅零售業經驗，商場業主唔止會睇我俾幾錢租金，仲會睇我做到幾多生意，如果我生意唔掂業主都未必會租俾我。所以商場營運者一定要掌握商舖嘅生意，否則呢個場實死路一條！呢個營運方式，應該套返落營運公眾街市。
環境及生態局副秘書長就答我，一路都有循住加強街市營運同加強競爭力去做，例如要求承辦商一定要有市場推廣經驗。
喂......我要求續租睇埋生意額，嗰重點係防止啲商戶「做又三十六，唔做又三十六」，要活化成個街市。但副秘答嘅嘢完全係兩回事喎！政府又話自己主導，但街市續租就分俾承辦商搞，然後又嚟立法會攞錢起新街市，跟住我哋又眼白白睇住一個又靚、又有冷氣嘅街市變成「死場」？真係咁都得？！
24 окт 2024
