相關連結:
【豪語錄】不慣被野生捕獲 歐鎧淳拍拖要避忌
bit.ly/2oIP7aq
【豪語錄】又靚又叻唔公平? 歐鎧淳:一切都係游水俾我
bit.ly/2p5GfrQ
為應付○八年奧運,歐鎧淳在會考前休學一年,到深圳受訓。以為可以擺脫每日放學、飛的去練水、回家還要做功課的港孩生活,誰知地獄在北方,「首先係訓練量加多咗成倍,每日游萬幾米,一開始直頭跟唔到。而家諗番,都覺得嗰陣嘅自己好犀利。」肉身疲累事小,失去自由事大,「冇電腦、唔可以同爸媽聯絡,軍訓式嘅生活。六點起身練青蛙跳、食飯、游水、跟住又食飯。夜晚六點睇新聞聯播、唱軍歌,跟住瞓覺,日日如是。」「唱歌都算了,睇新聞聯播最辛苦,嗰半個鐘就咁坐喺度。電視嘅唯一功用就係睇新聞聯播,好嚴重。」
跟她一起接受「國民教育」的,是無數窮家小孩,「佢哋幾歲就被人踢入嚟。屋企環境唔好,希望仔女有日做到全國冠軍,就係脫貧嘅工具。」「我係嗰種你逼我、我就唔想做嘅人。但當時嘅目標好清晰,就係要去我人生第一次奧運會,冇必要跟自己作對。」泳池最多池中物,比她游得更快的,都只能載浮載沉,「喺香港做運動員係好幸福嘅事。嗰邊太多人爭了,可以去到奧運嘅,(每個項目)只得兩個。」
競爭激烈,在美國亦然。歐鎧淳後來獲加州大學柏克萊分校取錄,會考後直接去彼邦升學、受訓。但對她來說,那是另一個荒島,「簡單嚟講,去到大陸,你嘅身份比較特殊,但美國就唔係。我由香港第一,跌到中下游,教練又唔係好睇我哋啦。」後來在柏克萊對史丹福的比賽中,歐鎧淳勝出。上水後,教練拋下一句:「Oh,so you can swim。」
鬼妹隊友講美國的肥皂劇,她搭不上嘴,童年回憶一片空白。就連衣著打扮都格格不入,「譬如我而家咁著,佢哋都會話:嘩,你著得咁奇怪,好Asian呀。」美國人不著衫乎?「佢哋都係淨色、鬆鬆哋、好自然咁囉。」即係pair,「哈哈,係呀,好pair。」「其實四年來都冇適應過。諗番轉頭,都係鍾意香港多啲。我係一個不折不扣嘅港女。」
壹週Plus : hk.next.nextmedia.com
即 like 壹週Plus fb : nextmagazinefansclub
7 апр 2017