鄧英敏設宴預祝70歲大壽 群星到賀埸面熱鬧 

鄧英敏設宴預祝70歲大壽 群星到賀埸面熱鬧
鄧英敏 今年入行50年，加上下個月就係佢70歲大壽，雙喜臨門就梗係要賀一賀啦。呢晚敏哥就同好拍檔 何國材 (十一哥) 舉行歡樂孖寶慈善夜，筵開42席，唔少圈中朋友都有出席，好似羅蘭、劉雅麗同媽媽包曉華、麥振江同囡囡麥詩敏、陳榮浚同太太吳香倫同麥翠嫻夫婦等等，真係好熱鬧啊﹗
敏哥同十一哥呢對歡樂孖寶，經常都行善帶歡樂比老友記，敏哥表示：「一個人最緊要係開心，開心就無病，無病就長命。」敏哥咁樂天，難怪下個月已經70歲嘅佢，都依然好似逆齡一樣無老過。
本來佢都無打算大肆慶祝，但係因為難得雙喜臨門，所以先決定藉呢次晚宴，行善兼同好朋友聚下，有嚟參加晚宴嘅劉雅麗同埋包曉華，就大讚敏哥口才了得，轉數快，所以劉雅麗話每次開演唱會，都會揾敏哥做司儀，永遠都有超班嘅水準。
至於同敏哥識於微時，同屬第三期藝員訓練班嘅麥振江，呢晚都同埋囡囡麥詩敏一齊出席，佢哋都大讚敏哥係天生嘅司儀人材，麥振江同阿女不嬲相處都好似朋友一樣，兩人更不時一齊拍片，不過啱啱新婚無耐嘅詩敏，就話呢排少咗返屋企，所以嚟緊都要安排下時間先得啦。
至於問到麥振江想唔想阿女快啲為屋企添返個新成員? 麥振江就搞笑同囡囡講：「你好好地「做人」呀」，睇黎似乎好恨抱孫喎，不過，麥詩敏就話呢方面一切順其自然啦。
#鄧英敏 #何國材 #十一哥 #歡樂孖寶 #羅蘭 #劉雅麗 #包曉華 #麥振江 #麥詩敏 #陳榮浚 #吳香倫 #麥翠嫻 #歡樂孖寶慈善夜 #出道50年 #70歲大壽
#TVB #娛樂新聞 #TVB娛樂新聞台
#ENews #HKENews #香港娛樂八卦新聞 #八卦新聞
即刻Follow TVB 娛樂新聞台 Facebook專頁
/ tvbenews
登入myTV SUPER享受睇TVB自製節目7日包括娛樂新聞的免費點播
bit.ly/2TXLlM0