1. Аршаттың шығармашылығымен 2018-2019 жылдардан бері таныспын. Шығармашылығынан бөлек, шынайылығы қатты ұнайды. 2. “Қалай ерекшеленемін деп іздендім” деді ғой. Меніңше, Аршаттың ерекшелігі - ішіндегі кез келген нәрсені қанық, қатты, қызық етіп шығаруында. Тіпті, махаббат, ғашықтық туралы әндерінде де нәзіктік сезілмейді. Құдды осы бір сезімді басқа қырынан танығандай боласың. Ал, әндерінде айқайлауы жай айқай емес, жанайқай ғой. Маған ұнайды. Тыңдап отырғанда сілкіп алатыны соншалық, өзің бірге айқайлағандай жеңілдейсің. 3. Қаншама концерттерінде болдым. Әндерін шығу тарихымен бірге айтып бергенде, шабыт, әсер, шығармашылық, ғашықтық деген осындай да болады екен-ау деп ұзақ ойланғанмын. 4. Ал, “Екеуміз жайлы бір ән жоқ” ең сүйікті әндерімнің бірі. Бейнебаяны шығатынына қуаныштымын. Өзіне ғана тән ерекше бір дүние күтемін. 5. Өкініштісі, соңғы жылдары көп тыңдамай кеттім. Екі түрлі себеп бар. Біз бір адамның өнерін не үшін жақсы көреміз? Өзіміздің ішіміздегі нәрселерге ұқсас, сәйкес, үндес болғанда. Осы тұрғыда менің жан-дүнием Аршаттың шығармашылығынан алыстап кетті. Екіншісі, концерттеріне бірге барып, әндерін тыңдап, талдайтын жаны менімен бір толқындағы адаммен араласпай кеттік. Бұл да өзінше әсер етеді екен. Бірақ, айналып келіп тұрамын. Өйткені, бір кездері әндерімен әсер сыйлаған, демеу болып, жаныңды түсінген талант иесін толықтай тыңдамай кету мүмкін емес. 6. Бастысы, Аршатқа шабыт, әсер, шыдам, өнерде ештеңені ойламай еркін жүзуі үшін мол табыс пен зор денсаулық тілеймін! Алматыда өзі айтқан концертін асыға күтеміз!
