40 yaşında təbəssümünə ölüm çökən həkim Səbinə Mirzəyeva | BİRİ VAR İDİ...
Biri var idi... O nə film qəhrəmanı idi, nə müğənni idi, nə də siyasətçi... Amma qısa ömründə onu hamı tanıdı və sevdi... Bu həyatda yeganə təsəllisi anaların, ataların övladlarını ona təhvil verəndə dedikləri bu söz idi: Göydə Allah, yerdə sən! Yəqin ki, bir insan üçün bundan böyük alqış ola bilməz! Biri var idi, hələ 40 yaşı olmamışdı, amma bir gün bütün Azərbaycan ondan danışdı... Biri var idi, ömrünün qırxıncı baharında Günəşi qürub edən Səbinə Mirzəyeva...
Cərrah mama-ginekoloq Səbinə Mirzəyeva 1978-ci ildə Bakı şəhərində anadan olub. Ailənin yeganə övladıdır. “Azərsutikinti" xəstəxanasının baş həkimi Elman Mirzəyevin qızıdır, anası Ofeliya xanım da eyni peşənin sahibidir. Valideynləri onu tibb sahəsində görürdü. Düzdür, atası qızının özü kimi cərrah olmasını istəmirdi, amma anası ginekoloq cərrah olmasının tərəfdarı idi.
Səbinənin üzərində böyük məsuliyyət vardı, o məşhur bir ailənin qızı idi, ona görə universitetə mütləq qəbul olmalı idi.
Lakin uzun illər hazırlaşdığı o gün, ali məktəbə imtahan verəcəyi an gəlib çatdıqda zəhərlənir, komaya düşür və nəticədə imtahana gedə bilmir.
Amma Tibb Universitetinə qəbul olmaq həvəsi onu növbəti bir il də müşayət edir və o nəhayət arzusuna çatır. 2001-ci ildə isə qəbul olduğu Azərbaycan Tibb Universitetini fərqlənmə diplomu ilə bitirir. Universiteti bitirəndən sonra 1 il işsiz qalır. Ancaq bu 1 il onun həyatında daha ciddi əhəmiyyət kəsb edir, o ustad həkimlərdən təcrübə əldə edir. 2003-cü ilə qədər Milli Onkologiya Mərkəzində cərrah onkoginekoloq kimi fəaliyyət göstərir. Ardınca arzusu olan Neftçilər xəstəxanasında cərrah mama-ginekoloq kimi işə düzəlir. İşə qəbul olunduqdan 1 ay sonra ailə həyatı qurur.
2003-2012-ci illərdə Mərkəzi Neftçilər Xəstəxanasında işləyib. 2012-ci ildə Almaniyanın Hamburq şəhərində yerləşən Eppendorf Universitetinin mama-ginekologiya kafedrasında yüksək riskli hamiləlik və doğuş üzrə təhsil proqramına yiyələnib.
2013-cü ildən “Baku Medical Plaza”da işləyirdi.
Peşəkarlıqda ad qazandığı üçün ölkənin hər yerindən ən riskli hamilləlik keçirən şəxslər onun yanına gəlirdi. Ona görə Səbinə Mirzəyevanın bütün həyatı həyəcan içində keçirdi... Sonu sızıltılı bir hadisə ilə bitən bu ömürdə nakam ölümə səbəblər axtardıqda bu mıəqamı da mütləq nəzərə almalıyıq.
Elə vaxt olur ki, cərrah ginekoloq 72 saat yatmır. Gərginlik, gərginlik, gərginlik... Lakin o bu işi ehtiyacdan deyil, sevgidən görürdü. Həyat dopinqi isə bir birinin ardınca qucağına aldığı körpələr olur...
Bəzən bir neçə doğuş yanaşı olduğundan o saatlarla klinikada olmaq məcburiyyətində qalır. Çünki onun başqa seçimi yoxdur, söhbət insan həyatından gedir. Belə günlərin birində onun övladının Əlifba bayramı keçirilir və Səbinə Mirzəyeva o tədbirdə ola bilmir. Axşam rəfiqəsi ona amansız və qısa bir mesaj yazır: “Süleymanın həyatında ikinci əlifba bayramı olmayacaq”...
Valideynləri həyatının ən həssas yeridir. Bu iki şəxsə olan sayqısı övladlarına qarşı sevgisindən heç də az deyildi
Sənət, idman və digər sahələrdə çalışıb məşhurluq qazanmaq rahatdır, bəs tibb sahəsində işləyərək, saatlarla ekranların deyil, əzab çəkən qadınların qarşısında duraraq necə məşhur olmaq, tanınmaq mümkündür? Bu məşhurluğun reseptini Səbinə Mirzəyevadan eşidək...
Haqqında yayılan bütün məlumatlar, barəsində danışan hər kəs pozitiv sözlər deyir. Hamı ona dua edir, hamı onun üçün göz yaşı tökür... O, peşəkarlığı fonunda qazandığı nailiyyətlərio kapitala çevirəndə ağlına gələn ilk ideya xeyriyyə fondu yaratmaq idi. Hətta bu barədə rəfiqələrindən biri ilə plan da qurubmuş. Elə burdan da onun nə qədər nəcib insan olduğu aydın görünür. İki övladı var, Süleyman və Tamerlan...
Az əvvəl qeyd etdiyimiz kimi Səbinə Mirzəyeva universiteti bitirdiyi illərdə bir müddət - 2001-2003-cü illərdə Milli Onkologiya Mərkəzində cərrah onkoginekoloq kimi fəaliyyət göstərib. Onkoloji xəstələrlə işləmək həkimlər üçün olduqca ağrılı prosesdir. Əksər pasiyentləri dünyasını dəyişən bu peşə sahibnləri xəstələrinə təkcə şəfa yox, həm də təsəlli vermək zorundadırlar. Belə yerlərdə çalışan həkimlər nakam pasiyentlərinin hər birinə öz ömründən bir neçə dəqiqə, bir neçə gün bağışlayır. Hələ bir də həkim həssas, insanlara əlahiddə sevgisi olan biri olsa... Ardını təsəvvür edin... Təsəvvür etməyin, Səbinə Mirzəyevanın həyatına baxın, hər şey aydın olacaq...
Əsas işi riskli hamililik və doğuşlarla bağlı olduğundan Səbinə Mirzəyevanın qısa ömrünə fasiləsi olmayan bir həyəcan fiti kimi də baxarıq... Reanimasiyadan palataya, palatadan sərahiyyə otağına... O, çalışdığı bütün müəssisələrdə işə aşırı sevgi verdiyindən bu münasibətə bəzən adekvat reaksiya görmürdü. Peşəkarlaşmayan tibb sahəmiz, diletant həmkarlar.. Haqsızlıqlar və s... təbii ki, bütün bunlar da həssas bir qadının səhhətinə təsirsiz ötüşmürdü. Onu 40 yaşa qədər saxlayan isə həyatda saxladığı pasiyentlərinin səmimi duaları oldu.
#sebinemirzeyeva #birivaridi #trend
29 сен 2024
