Ia video-o nikenggipa biap unia ro'ongrangni bidingo talatna man'kuja; maina uan sandirikkotani ning'o ong'miting.
Ua biapko nikna man'ani gimin kusi ong'preta pil'sara dukba ong'skkaa; maina ia biapara matburingrangni neng'takram biapsachim.
Ua biapko manderangna parakatani miksonganiara A'chikrangoni seng'gipa-matgipa manderangming ia biapni bidingo namedake chanchirime kam ka'rimna ku'mong-nangrimaniko ra'bana ong'a.
A'chikrango KOSI rokom 4 gnang: 1. Nokma Kosi, 2. A'song Kosi, 3. A'mal Kosi, unia 4. Nokpante Kosi. Uarangoni ua nikenggipa biap ba kosiara A'SONG KOSI ong'a.
A'song Kosiko songni-nokni pilak duk-suk, an'seng-baljokani ba kengnirangoniko chel'chaksona bilsiprako ba songni dakbaenga gita bilsisa watchange mania. Jekon A'SONG DEN'A ine agana. A'bong Noga Raja A'song Den'mitingo badiao kram sitechaka, boli on'gipa be'enko bachipak dona, unia bano kimildam songchaka, uarangko ia video-ko tariaonade parakna man'kuja.
Video quality namna man'jaha. Chola gipokko gane re'angode chap dimsittipani gimin ia videoko ka'na chola gisimko gane re'angaha. Chap-ni ja'rikade komiachim. Ru'aatkon man'chakskajajok; maina ia videoko ka'mitingo mikka jimbee waachim. Camera lens rango ru'at ma'baka rimilchipaiaha. A'oni maldoa, bolrikeoni bilondapa man'chakja. Ru'atkon okkae chikchina chakchike video ka'na nangaiaha. Uarangni a'sel video quality namsrangjaha.
2 май 2019
