"ALLAH" ŞEİRİ  

Müəllif: Samin Məmmədov
İfa: Əməkdar artist Cəlal Məmmədov
Video montaj: Emin Məmmədov
-----
Yoxluqdan var edib bu kainatı,
Ərşin üzərinə ucalıb Allah.
Göyün də, Yerin də hər məxluqatı,
Səndən qüvvətlənib, güc alıb, Allah!
Ağacdan tökülən bir quru yarpaq,
Sənin o elmindən qalmayar gizli.
Verdiyin əmr ilə olubdur torpaq,
Baxçalı, meşəli, çaylı, dənizli.
Qaranlıq gecədə gəzən qarışqa,
Qara daş üstündə Sənə əyandır.
Sənin o hökmündən bircə qarış da,
Bu aləm nə o yan, nə də bu yandır.
Yuvadan ac uçub çıxan hər quşa,
Dən verib qaytaran Sənsən tox ikən.
Sənin istəyinlə gəlibdir cuşa,
Bütün bu kainat heçdən yox ikən.
Hər şeyi bürüyən Öz elmin ilə,
Ağızı, burunu, gözü var etdin.
Qüsursuz hökmünlə, “ol” əmrin ilə,
Dil-dodaq yaradıb sözü var etdin.
Göydə qanad çalıb səmada süzən,
Uçmaqla həzz alan quşlar yaratdın.
Balıq tək durmadan fəzada üzən,
Ulduzlar, günəşlər, daşlar yaratdın.
İnsanı yüksəltdin Sən pillə-pillə,
Ona ağıl verdin, ona nur verdin.
Müxtəlif rəng ilə müxtəlif dillə,
“Bir kəsdən” xəlq edib Sən qürur verdin.
Sən suyu yaratdın duru, pak, təmiz,
Günəş istisində susuz yanmayaq.
Bu qədər nemətlər qarşısında biz,
Bəs necə baş əyib Səni anmayaq?
Ölüm tək yuxuya daldıqdan sonra,
Bizi çıxarırsan nurlu sabaha.
Ruhumuz yanında qaldıqdan sonra,
Sənə dönəcəyik yenə, bir daha.
Pambıq tək görsənən ağır buludu,
Bir yerə qovursan küləklər ilə.
Sənin dərgahında insan uludur,
Yalnız təqva dolu ürəklər ilə.
Sənsən göy otları, yaşıl ağacı
Qışda qurudaraq yazda can verən.
Sənə ibadətdir insan amacı,
Budur “o dünyada” həyəcan verən.
Günəşi xəlq edib nur verdin Aydan,
Gül-çiçək bitirdin yağan yağışla.
Nə vaxt ki, köçərik fani dünyadan,
Bizi əfv eylə Sən! Bizi bağışla!
Bizi əfv eylə Sən! Bizi bağışla!
#Allah #Yaradan #Xaliq #İslam #din #Quran #kainat #insan #göy #ulduz #bulud #Yer