نبات الشمبلان
بدأت اسماك الجوبي بالتفريق باعداد كبيرة
لتوفير الحماية للزريعة (الافراخ) قمت بجلب نباتات نهرية لكي اضعها في الاحواض لتتمكن الافراخ (الزريعة) من الاختباء فيها
نبات الشمبلان
مريت بضفاف دجلة، وكفت السيارة كلت خلي انزل ارتاح قبل ماارجع للبيت، صار كبالي نبات الشمبلان، كلت خلي اليوم افرح سمجاتي بشويت زرع، مديت ايدي واخذتلي حفنة على كد احواضي، وصلت للبيت بديت اغسلة زين بالمي القوي، علمود اتخلص من كل العوالق اللي اتضر الاسماك، بالصدفة لكيت حلزون مخروطي، كلت خلي احتفظ بي، ضليت اغسل الزرع حوالي عشر دقايق، الى ان طلع الطين كلة، قبل مااوزع الزرع لبقية الاحواض، حطيت الزرع يومين بحوض الكولدفيش الكبار،علمود ياكلون شكو حلزونات سوداء واي عوالق مفيدة اخرى، شوفو الزرع شلون اخضر داكن وحلو، هذه اول مرة اخذ زرع من الشط، واخذت على كد اللي يكفيني فقط، وكلت مايصير اخذ اكثر، وهذه النتيجة بعد ماوزعت الزرع على احواض الكوبي،
هسة رجعت اربي كوبي من جديد بعد ماماتت كل كوبياتي، والحمد لله اشتريت اربع اسماك ثاني يوم فرخن عندي خمسين فرخ وهسة صار عمرهن الشهر، فوائد النباتات في احواض الكوبي، بالدرجة الاولى اتساعد الافراخ حديثي الولادة الاختباء من الكبار يعني مايحتاج اعزل الافراخ عن الكبار، اما فوائدة لحوض الكولدفيش اذا وضعت الانثى بيوضها عليه تكون احتمالية فقس البيوض عالية، لان اذا سقطت البيوض اسفل الحوض فان احتمالية فقها اتكون اقل، ويعتبر ايضاً غذاء يرفع خصوبة الذكور والاناث لجميع الاسماك، ملاحظة اذا وضعتوا الشمبلان في احواض الكولدفيش للزينة فابشركم انه راح ياكلوه كله بعد يومين. تحياتي لكم Ceratophyllum plants
8 сен 2024