ƏLİ ƏKBƏR!
Ey şəni mələkmənzər, Əli Əkbər!
Tahaya üzün bənzər, Əli Əkbər!
Keçmiş sənə Xatəmdəki çox rəftar,
Həm məntiqin, əxlaqın Ona oxşar.
Ruhunda da, cismində də nisbət var,
Ey surəti Peyğəmbər, Əli Əkbər!
Hər dəm qorudun haqqı əyilməkdən,
Hifz eylədin İslamı yenilməkdən.
Heç qorxmadın Haqq naminə ölməkdən,
Eynilə baban Heydər, Əli Əkbər!
Meydana gedən vaxtı alıb rüsxət,
Göstərdin ədəb, aldı bəşər ibrət.
Fəxr etdi Hüseyn səndə görüb cürət,
Yox sən kimi cəngavər, Əli Əkbər!
Vardırmı fəzilətli cavan sən tək?!
Zülmət gecəyə mahi-taban sən tək.
Kimdir gətirən tabü-tavan sən tək,
Meydanda igid əsgər, Əli Əkbər?!
Sən dinə havadar Əli Əkbərsən,
Eşqində fədakar Əli Əkbərsən.
Həm əhdə vəfadar Əli Əkbərsən,
Ey körpələrə dilbər, Əli Əkbər!
Nəşin düşən an üstünə səhranın,
Söndü günəşi Həzrəti Leylanın.
Kül oldu o gün başına dünyanın,
Gül misli olan pərpər, Əli Əkbər!
İsmin anılar Mahi-Muhərrəmdə,
Qarə geyərik köynəyi matəmdə.
Aslan nəfəs aldıqca bu aləmdə,
Zikr eylər Əli Əkbər, Əli Əkbər!
Müəllif hüquqları qorunur.
5 окт 2024
