Bu şeir əziz və dəyərli ruhanimiz Hacı Ramil Bədəlovun mövlud günü münasibətilə yazılıb:
Elminlə edirsən bizi irşad, əziz Ustad!
Daim olasan dəhridə dilşad, əziz Ustad!
Xoş halına, Allah sənə vermiş uca nemət,
Peyğəmbərə varislik olub şəninə qismət.
Əldə qələmin var ki, şəhid qanına nisbət,
Yoxdur qəti bundan uca bir ad, əziz Ustad!
Elm öyrədən hər bir kəsi Allah tutar üstün,
Hər gah o kəs insanlara yol göstərə düzgün.
Sən haqq yolu təlqin eləyirsən bizə hər gün,
Sayəndə olur qəlbimiz abad, əziz Ustad!
Minbərdə görən olmadı səndən quru təşviq,
Öncə özün etdin dediyin hər sözü tətbiq.
Hər kim tanıyırsa, edər əlbət bunu təsdiq,
Tək-tək tapılar sən kimi ustad, əziz Ustad!
Nitqinlə ürəklərdə qoyursan elə təsir,
Aram olur hətta səni dinlərsə, müqəssir.
Ən sadə üsulla eləyirsən sözü təfsir,
Hər dinləyənin könlü olur şad, əziz Ustad!
Hər işdə edirsən uca Allaha təvəkkül,
Allah səni qoymaz edəsən zərrə tənəzzül.
Hər dəm elədin Həzrəti Zəhraya (s.a) təvəssül,
Məhşərdə də eylər O səni yad, əziz Ustad!
Müəllif: Aslan Aşiq
4 фев 2024
