Şehzade Bayezid'in babası Kanuni Sultan Süleyman'a mektubu ve aldığı cevap
Müzik:
Ottoman instrumental Tasavvuf Music 02
YeniFetih
Ey serâser âleme sultân Süleymânum baba
Tende cânum cânumun içinde cânânum baba
Bâyezidine kıyar mısın benüm cânum baba
Bîgünâhım Hak bilür devletlü sultânum baba
Enbiyâ serdefteri yâni ki Âdem hakkıçün
Hem dahi Mûsî ile Îsî-i Meryem hakkıçün
Kâinâtın serveri ol Ruh-i â'zam* hakkıçün
Bîgünâhım Hak bilür devletlü sultânum baba
Sanki Mecnûnum bana dağlarbaşı oldu durak
Ayrulup bilcümle mâl ü mülkden düşdüm ırak
Dökerüm göz yaşumu vâ-hasretâ dâd el fırâk
Bî-günâhum Hak bilür devletlü sultânum baba
Kim sana arzeyleye hâlüm eyâ şâh-ı kerîm
Anadan kardaşlarumdan ayrulup kaldım yetîm
Yok benüm bir zerre isyânum sana Hakdur alîm
Bî-günâhum Hak bilür devletlü sultânum baba
Bir nice ma'sûmum olduğun şehâ bilmezmisün
Anlarun kanına girmekten hazer kılmazmusun
Yoksa ben kulunla Hak dergâhına varmazmısun
Bîgünâhım Hak bilür devletlü sultânum baba
Hak teâlâ kim cihanın şahı itmişdür seni
Öldürüp ben kulunu güldürme şahum düşmeni
Gözlerim nuru oğullarımdan ayırma beni
Bigünâhum, Hak bilür devletlü sultânum baba
Tutalum iki elim baştan başa kanda ola
Bu meseldür söylenür kim kul günâh itse n'ola
Bâyezîdin suçunu bağışla kıyma bu kula
Bîgünâhım Hak bilür devletlü sultânum baba
Şehzade Bayezid
-.-.-.-.-.
Ey demâdem mazhar-ı tuğyân u isyânum oğul
Takmıyan boynuna herkiz tavk-ı fermânum oğul
Ben kıyarmıydum sana ey Bâyezîd-Hânum oğul
Bîgünâhum dime, bâri tevbe kıl cânum oğul
Enbiyâ vü evliyâ ervâh-ı azem hakkıçün
Nûh u İbrâhim u Mûsâ İbni Meryem hakkıçün
Hâtm-i âsâr-i nübüvvet Fahr-i Âlem* hakkiçün
Bîgünâhum dime bâri tevbe kıl cânım oğul
Âdem adın itmiyen Mecnûna sahrâlar durak
Kurb-i taatden kaçanlar dâimâ düşer ırak
Ta'n değildür dir isen vâ hasretâ dâd el firâk
Bîgünâhum dime, bâri tevbe kıl cânum oğul
Neş'et-i Hakdur übüvvet râm olan olur kerîm
"Lâ-tekul-üf" kavlünü inkâr eden kalır yetîm
Tâate isyâna alîmdür Hudâvend-i Kerîm
Bîgünâhum dime, bâri tevbe kıl cânum oğul
Ruhm ü şefkat zîb-i îmân olduğun bilmezmüsün?
Ya dem-i masûmu dökmeden hazer kılmazmusun?
Abd-i âzâd ile Hak dergâhına varmazmısın
Bîgünâhum dime, bâri tevbe kıl cânum oğul
Hak reâyây-i mutî'e râî etmişdir beni
İsterüm mağlûb idem ağnâma zîbi düşmeni
Hâşe lillâh öldürürsem bîgünâh nâgâh seni
Bîgünâhum dime, bâri tevbe kıl cânum oğul
Tutalım iki elün başdan başa kanda ola
Çünki istiğfâr idersün biz de afv itsek n'ola
Bâyezîdim suçunu bağışlarım gelsen yola
Bîgünâhum dime, bâri tevbe kıl cânum oğul
Kanuni Sultan Süleyman
#kanunisultansüleyman #divanedebiyatı #divan #şiir #şiirheryerde #edebiyat #babaoğul #osmanlı #kanuni
1 июн 2024
