今代寶馬3系已推出一段日子，我們都試過好幾次，想知詳盡的試車報告可以睇返《TopGear 極速誌》的127和129期，又或者上我們的網站摷摷。今次借320i揸了一個weekend，主要想了解下新款3系在舒適度和空間提升的同時，還保留了多少所謂driver’s car的元素。先講少少背景，這部320i是M Sport版，賣$499,000，比普通Sport版貴5萬，設備上除了一些M Sport的裝飾，也包括18吋鈴、M Sport軚盤、前座sport seats、M Sport懸掛和制動。
這幾天接載過幾批朋友，每次都會問後座後得舒不舒服，答案都幾一致。空間上，大家都覺得正的，腳的伸展空間很多，座姿也舒適，記得上一代F30的後座十分標準，即是仍在D-segment房車的框架內，不越雷池一步。但今代軸距加碼，空間也加碼，而且加得相當明顯，幾乎升了半個車系，純論空間有潛力改名做3.5系，哈。不過，另一口供一致的地方卻非好評，個個都話後座好「櫈」，跳動太多。我也試過330i的M Sport版，記得懸掛同樣偏硬，但未至於過份，反而這部320i的跳動幅度較大，這就有點奇怪。用了M Sport懸掛，彈弓的確硬，車內感受到的頓挫和密度都高，好多時連前座都感受到後軸的反應，對平日行車的舒適感打了折扣。就算是東區走廊，每過一次路面接駁位都會明顯跳一跳，較為快時遇着彎位，甚至會拋一拋。反而走上荃錦公路盡情揸，又會覺得無大問題，跑起來貼貼伏伏，非常滿意。最後的結論是，如果揀3系，入門款320i配M Sport懸掛未必是黃金組合，因為我覺得揀得320i，要求舒適性與駕駛感之間的平衡，不會太則重於後者，反而去到330i或更高階型號，加埋支撐力更強的M Sport懸掛會合理一點……
－－－－－－－－－－－－－－－－－－－－
Web：www.topgearhk.com
FB： / topgearhk
IG： / topgearhk
24 окт 2019
