Nos hobennan ku mester bai studia den eksterior ta konfrontá retonan hopi grandi ora ku nan ta bandoná nan hogar, nan país i konsekuentemente nan afektonan, amigunan i kostumbernan. E trayekto aki ta kuminsá for di buskeda di e skol adekuá, un kas pa biba aden i hopi rekurso mas. Aparte di esei, nan ta bai na un edat kaminda nan ta kuminsá sinti efektonan propio di nan desaroyo fisiko i mental, lokual mayoría di biaha ta generá trastorno emoshonal produkto di kambionan den nan sistema hormonal propio di nan edat, tantu den muchahomber komo muchamuhe. Después ta bin e shock produkto di un adaptashon na otro kultura, otro idioma, otro kas, skol, bario i otro forma di bida.
Tur esaki ta hasi nesesario un guía i orientashon adekuápa e hoben i su famia por enfrentá e proseso di adaptashon ku menos trouma posibel.
Virtual Youth Support a ser kreá basta tempu pasá pa duna e muchanan i nan famia un man den e proseso difisil aki. Konosiendo e nesesidatnan di nos hobennan den edat estudiantil nan a bini ku un proyekto nobo, Studyboost Academy, kaminda e mucha i hoben por haña yudansa "online" den e realisashon di "huiswerk" i mehorashon di su nivelnan di konosementu den materianan kaminda tin mester. Sra. Miraila Bernadina, Direktor di Virtual Youth Support ta nos invitado awe den Bonochi Kòrsou.
19 сен 2024
