Parish and National Shrine of St. Padre Pio Live Mass Today Begins
Biyernes ng Ika-18 na Linggo sa KARANIWANG PANAHON. August 09, 2024
Paggunita kay Santa Teresa Benedicta dela Cruz, dalaga at martir
UNANG PAGBASA
Nahum 2, 1. 3; 3, 1 - 3. 6-7
Pagbasa mula sa aklat ni propeta Nahum
Masdan mo’t dumarating na ang maghahatid ng mabuting balita, at magpapahayag ng kapayapaan! Ipagdiwang mo ang iyong mga pista, Juda, at tuparin ang iyong mga pangako, sapagkat hindi na muling darating sa iyo ang masama, siya’y ganap nang naparam.
Panunumbalikin ng Panginoon ang kadakilaan ni Jacob, gaya ng nararapat sa Israel. Sapagkat hinuburan sila ng mga lumusob at sinira ang kanilang mga ubasan.
Kawawa ka, lungsod na mamamatay-tao,
bayang sinungaling at mangangamkam; walang katapat sa sama!
Lumalagapak ang mga latigo,
Rumaragasa ang mga gulong, nagdadambahan ang mga kabayo!
Humahaginit ang mga karwahe.
Sumusugod ang mga mangangabayo, kumikinang ang kanilang tabak,
Kumikislap ang dulo ng sibat; di mabilang ang patay.
Naghambalang ang mga bangkay,
natitisod ng nagdaraan.
Tatabunan kita ng dumi, gagawing hamak, at iismiran.
Lalayuan ka ng lahat ng makakakita sa iyo.
Sasabihin nila, “Hayan ang Ninive!
Sino ang tatangis sa kanya?”
At saan ako hahanap ng aaliw sa kanya?
Ang Salita ng Diyos.
SALMONG TUGUNAN
Deuteronomio 32, 35kd-36ab. 39abkd. 41
Nasa pasya ng Maykapal
ang buhay at kamatayan.
Darating ang araw ng aking paniningil at paghihiganti,
hanggang sa sila’y humapay at mabuwal
pagkat ang wakas nila ay malapit na.
Ililigtas ng Poon ang kanyang bayan
siya’y mahahabag sa mga maglilingkod sa Kanya.
Nasa pasya ng Maykapal
ang buhay at kamatayan.
“Malalaman ngayong ako ay ako nga,
at maliban sa akin, wala nang Diyos.
Ako’y pumapatay at maaaring bumuhay,
napapagaling ko ang aking sinusugatan.
Nasa pasya ng Maykapal
ang buhay at kamatayan.
Ihahasa ko itong aking tabak
at ang katarunga’y aking igagawad
ang parusa’y ibabagsak ko sa mga kaaway
at sisingilin ko ang sa aki’y nagsusuklam.”
Nasa pasya ng Maykapal
ang buhay at kamatayan.
ALELUYA
Mateo 5, 10
Aleluya! Aleluya!
Mapalad ang inuusig
sa gawang puspos ng bait,
pagkat may kakamting langit.
Aleluya! Aleluya!
MABUTING BALITA
Mateo 16, 24-28
Ang Mabuting Balita ng Panginoon ayon kay San Mateo
Noong panahong iyon, sinabi ni Hesus sa kanyang mga alagad, “Kung ibig ninumang sumunod sa akin, limutin niya ang ukol sa kanyang sarili, pasanin ang kanyang krus at sumunod sa akin. Ang naghahangad na magligtas ng kanyang buhay ay siyang mawawalan nito; ngunit ang mag-alay ng kanyang buhay alang-alang sa akin ay siyang magkakamit noon. Ano nga ang mapapala ng isang tao, makamtan man niya ang buong daigdig kung ang katumbas naman nito’y ang kanyang buhay? Ano ang maibabayad ng tao para mabalik sa kanya ang kanyang buhay? Sapagkat darating ang Anak ng Tao na taglay ang dakilang kapangyarihan ng kanyang Ama at kasama ang kanyang mga anghel. Sa panahong yao’y gagantihin niya ang bawat tao ayon sa kanyang ginawa. Sinasabi ko sa inyo: may ilan sa inyo rito na hindi mamamatay hangga’t di nila nakikita ang Anak ng Tao na pumaparito bilang Hari.”
Ang Mabuting Balita ng Panginoon.
#onlinemass #livestreammass #padrepiomass
Roman Catholic Archdiocese of Lipa (RCAL)
Parish and National Shrine of Saint Padre Pio - Batangas
9 сен 2024
