കൊച്ചിയിലെ ഒരു രാജാവിന് പൂച്ചക്കണ്ണ് ഉണ്ടായിരുന്നു. പൂച്ച എന്ന് ആരെങ്കിലും പറഞ്ഞാൽ പോലും അവൻ്റെ കാര്യം പോക്കാ. ഒരുദിവസം പൊതിയിൽ രാമച്ചാക്യാർ രാജസന്നിധിയിൽ കൂത്ത് പറയുമ്പോൾ പൂച്ചക്കണ്ണൻ എന്ന് പറഞ്ഞു പോയി. തല രക്ഷിക്കാൻ കൂത്ത് കഴിയൂന്നതിന് മുൻപ് മുടിയഴിക്കാതെ രംഗത്ത് നിന്നും ഓടിപ്പോയി. കുറെക്കാലത്തിന് ശേഷം രാജാവും ചാക്യാരും നേർക്കു നേരെ വരാൻ ഇടയായി. രാജാവ് ഉറയിൽ നിന്നും വാളൂരി " ഇപ്പളോ രാമാ" ,എന്ന് ചോദിച്ചു. "അടിയൻ, പൂച്ചേക്കണ്ട എലിയെ പോലെ" എന്ന് മൊഴിഞ്ഞു. രാമൻ്റെ ധൈര്യത്തിൽ സംപ്രീതനായ രാജാവ് രാമച്ചാക്യാരെ വീരശൃംഖല അണിയിച്ചു എന്നാണ് കേട്ടിട്ടുള്ളത്.
