Dəmir yoluna texniki qulluq üçün robot işçi 

Dəmir yoluna texniki qulluq üçün robot işçi
1980-ci illərin elmi fantastika filmindən çıxan robota bənzəsə də, Qərbi Yaponiya Dəmiryolunda yeni humanoid robot işçi var.
Rels üzərində hərəkət edə bilən krana quraşdırılan robot bu aydan etibarən şirkətin şəbəkəsində texniki xidmət işlərində istifadə olunacaq.
Onun operatoru robotu daşıyan kranın üstündə oturur və kameralar vasitəsilə robotun gözləri ilə “görür” və onu uzaqdan idarə edir.
Hündürlüyü 12 metrə çata bilən robot 40 kiloqram ağırlıqda olan əşyaları daşıya bilir, qollarındakı müxtəlif qoşmalardan istifadə edərək fırça tuta və ya zəncirli mişardan istifadə edə bilir.
Şirkət bildirib ki, hələlik robotun əsas vəzifəsi relslər boyu ağac budaqlarını budamaq və qatarlarda kabelləri tutan metal çərçivələri rəngləmək olacaq.
Bu texnologiya Yaponiyada işçi qüvvəsi çatışmazlığını doldurmağa kömək etmək və yüksəklikdən yıxılma və ya elektrik cərəyanı vurması kimi iş yerlərində baş verən qəzaları azaltmaq məqsədi daşıyır.